Misioni i OSBE-së në Kosovë ka reaguar ndaj sjelljes së anëtarit të Vetëvendosjes në KQZ, Sami Kurteshi, duke e cilësuar atë si të papranueshme dhe të dëmshme për lirinë e medias. Në reagimin e tyre, ata theksuan se liria e mediave dhe diskursi publik i përgjegjshëm janë thelbësore për funksionimin e demokracisë në Kosovë.
“Përfaqësuesit politikë në organet e pavarura duhet të mbështesin standardet më të larta të profesionalizmit dhe respektit”, thuhet në deklaratën e OSBE-së, e cila kërkon përgjegjësi më të madhe nga zyrtarët publikë në raport me mediat.
Gjuhën e përdorur nga Kurteshi kundrejt gazetarëve dhe ndaj Asociacionit të Gazetarëve të Kosovës (AGK) e ka dënuar edhe Zyra e Bashkimit Evropian në Kosovë, si dhe organizata të ndryshme që mbrojnë të drejtat e gazetarëve.
Në një reagim të tij, Kurteshi e quajti AGK-në “Aleancë të Grupeve Kriminale” dhe akuzoi disa media se po veprojnë si “vrasës me pagesë”, deklarata këto që kanë ngjallur shqetësim të gjerë publik.
AGK u kundërpërgjigj duke thënë se akuzat janë jo vetëm të pabaza, por edhe të rrezikshme, pasi mund të nxisin sulme të mundshme ndaj gazetarëve dhe stafit të mediave në terren. Sipas AGK-së, një gjuhë e tillë agresive cenon drejtpërdrejt sigurinë dhe pavarësinë e punëtorëve të medias.
Organizatat ndërkombëtare dhe vendore vazhdojnë të apelojnë për qasje më të kujdesshme dhe respekt ndaj profesionit të gazetarisë, si garanci për një shoqëri demokratike dhe transparente.
