Me disa orë shtyerje, nisi seanca e parë e rigjykimit të dy të akuzuarve për vrasjen e Marigona Osmanit.
Dardan Krivaqa dhe Arbër Sejdiu, edhe në rigjykim mohuan fajësinë e tyre.
“Jo nuk e pranoj fajësinë, nuk e pranoj akuzën e prokurorit”, tha i akuzuari Krivaqa.
Kryetari i trupit gjykues, Sahit Krasniqi e pyeti të akuzuarin tjetër Arbër Sejdiu, se a e pranon fajësinë.
“Jo”, tha Sejdiu.
Mbrojtja e Krivaqës tha se aktakuza e Prokurorisë Themelore në Ferizaj është hipotetike dhe e pabazuar.
“Aktakuza në bazë të së cilës dyshohen është një aktakuzë hipotetike, ashtu siç e ka konstatuar edhe Gjykata e Apelit. Sepse bazohet në prova të pambështetura në ligj, ku është në pyetje fajësia. Gjatë hetimit të kësaj çështje penale nuk janë respektuar standardet ligjore të parapara me KPRK sepse prokuroria është lëshuar në intepretime të veprimeve të të akuzuarve, pa u mbështetur në prova materiale”, tha avokati i Krivaqës, Skender Musa.
Ai në fjalën hyrëse propozoi kryerjen e disa ekspertizave.
“Të bëhet ekspertiza e gjendjes psikitartike dhe atë para kryerjes së veprës, që nga shkolla fillore dhe qëndrimi në qëndrën e rehabilitim për të mitur, ku në bazë të raporteve të kësaj qendre, Dardani ka tentuar të vetvrititet. Kurse, në kohën e qëndrimit në burgun e Dubravës, Dardani është bullizuar dhe ka dyshime që ai është dhunuar”, tha tutje Musa.
Nga mbrojtja e Sejdiut, u tha se përgjatë procesit gjyqësor do të vërtetohet pafajësia e tij.
“Gjatë këtij procesi penale pas trajtimit në mes tjerash edhe vërejtjet e dhëna nga Gjykata e Apelit, në fund do të bindim trupin gjykues se Arbër Sejdiu nuk është përgjegjës për veprën penale për të cilën po e akuzon Prokuroria Themelore në Ferizaj”, tha avokatja e Sejdiut, Arbnora Shefkiu.
Prokurori e mbrojtja e viktimave mbesin pranë fjalës hyrëse të dhënë më herët.
Palët u pajtuan që mos të ftohen dëshmitarët, por të lexohen vetëm deklarimet e tyre të dhëna në shqyrtimin paraprak.
