E mërkura e parë e muajit mars është data e fundit për të zgjedhur pozitën më të lartë shtetërore.
Katër marsi është dita përfundimtare që Kosova të ketë presidentin e ri.
Presidentja aktuale, Vjosa Osmani javë më parë ka treguar që synon edhe një mandat.
Por pavarësisht që kanë mbetur edhe dy javë, ende nuk ka ndonjë kundërkandidat.
Madje, njohësit e çështjeve politike thonë se opozita janë vonë dhe duhet të kenë edhe ata një emër.
Profesori Basri Muja thotë se kjo duhet të bëhet sa më shpejt.
“Sigurisht që partitë opozitare do të duhej me i fillu konsultimet e tyre më herët, por se nuk mendoj që jemi ende vonë. Nëse ka vullnet politik besoj që kjo pune mundet me u kry shpejt. Partitë opozitare duhet të gjejnë një kandidat apartiak i cili nuk lidhet dhe nuk ka asnjë ndikim në asnjë prej partive politike dhe me sfidu propozimin apo kandidaturën e Vjosa Osmanit prapë, që duket se ajo do të jetë prej Lëvizjes Vetëvendosje. Përndryshe nuk ka kuptim bllokada sepse ne e patëm një situatë me bllokadë gjatë ngërçit 10 mujor dhe i pamë pastaj rezultatet e zgjedhjeve”, thotë ai.
Qe ky proces është në vonesë e thotë edhe profesori, Mazllum Baraliu.
Baraliu tregon se sinjalet janë që partitë politike këtë punë po e lënë në minutat e fundit.
“Është një defekt i kësaj klase politike që i lë gjërat në minutën e fundit, ndërkohë që afatet kushtetuese dhe ligjore janë mjaft të ngushta. Duhet që partitë politike të jenë më të përgjegjshme. Pra është një heshtje dhe një vonesë shumë me kosto që thjesht nuk lejon që të kemi mundësinë një qartësim të procesit, nuk lejon mundësinë që të kemi një përcaktim qytetar për kandidat të mundshëm, një debat eventual që do të duhej të ishte, mbi të gjitha me zënien e afateve kohore për të mos u vonuar dhe të mos rënë në shkelje qoftë kushtetuese dhe qoftë ligjore të këtij procesi”, shprehet Baraliu.
Ndërsa deputeti i Partisë Demokratike të Kosovës, Xhavit Haliti thotë se preferojnë një kandidat nga opozita, por sipas tij kjo nuk bëhet pa marrëveshje me Kurtin.
Televizioni iu ka drejtuar me pyetje edhe përfaqësuesve të partive opozitare, se a janë ftuar për takim nga presidentja Vjosa Osmani ose nga kryeministri Albin Kurti për të diskutuar rreth çështjes së presidentit.
Por nga Lidhja Demokratike e Kosovës dhe Aleanca për Ardhmërinë e Kosovës nuk kanë kthyer një përgjigje.
