Një vajzë e mitur ka dorëzuar në polici një kuletë të gjetur në rrugë, brenda së cilës ndodheshin dokumente personale dhe 2 mijë euro.
Sipas njoftimit të Policisë së Kosovës, ngjarja ka ndodhur më 29 maj, kur e mitura është paraqitur në Stacionin Policor në Mitrovicën e Jugut dhe ka dorëzuar kuletën që kishte gjetur në rrugën “Lah Nimani”.
Pas pranimit të rastit, zyrtarët policorë kanë ndërmarrë veprimet e nevojshme për identifikimin e pronarit. Duke u bazuar në dokumentet e gjetura në kuletë, ata kanë arritur ta kontaktojnë atë dhe pas verifikimeve përkatëse, ia kanë kthyer kuletën së bashku me shumën e parave.
