Një nga dëshirat kryesore të Xabi Alonsos në rolin e tij të ri si trajner i Real Madridit është nënshkrimi me mesfushorin e ri argjentinas, Nico Paz. Megjithatë, sipas raportimeve të fundit nga Italia, në garë për të është futur edhe një rival i ri.
Real Madridi ndodhet përpara një vere rindërtimi pas largimit të Carlo Ancelottit dhe ardhjes së Alonsos, ku pas një sezoni pa trofe, pritshmëritë janë të larta dhe trajneri i ri ka identifikuar Paz si një përforcim kyç.
Bordi i klubit është i vetëdijshëm se trajneri do të ketë nevojë për një skuadër të thellë për të përballuar një sezon të gjatë dhe të ngarkuar. Deri tani, në Madrid kanë mbërritur Trent Alexander-Arnold, Dean Huijsen dhe Franco Mastantuono.
Nico Paz, i cili shkëlqeu këtë sezon në Serie A, shihet si zgjidhja ideale për mesfushën. Pas dështimit për të bindur Martin Zubimendin dhe në pritje të zgjidhjes së çështjes Alvaro Carreras, ai është kthyer në objektivin kryesor në atë repart.
Xabi Alonso, që e njeh mirë Nicon nga koha në akademinë e Realit, e sheh atë si lojtarin ideal për të zëvendësuar Modric dhe për t’i dhënë skuadrës më shumë qarkullim dhe ide në mesfushë.
Për javë të tëra, Real Madridi ka qenë favorit për të siguruar shërbimet e Paz, por sipas Calciomercato, Interi është futur fuqishëm në garë pas emërimit të Chivus si trajner. Rumuni e kërkon me ngulm për të freskuar një mesfushë që po plaket.
E ardhmja e Nico Paz pritet të vendoset pas përfundimit të Kupës së Botës për Klube në SHBA, ku Real Madridi dhe Interi janë ende në garë. Megjithatë, në Madrid janë të vetëdijshëm se nuk janë më të vetmit që trokasin në derën e talentit argjentinas.
Los Blancos vazhdojnë ta kenë një klauzolë ku iu lejohet rikthimi i tij në Santiago Bernabeu, megjithatë tani varet edhe nga dëshira e lojtarit se cilën skuadër do ta zgjedhë.
