Vendin e punës e kishin të përbashkët për vite të tëra.
Elez Peci bashkë me Avni Shalën, ishin kolegë me rreshterin Afrim Bunjaku, deri në orët e para të 24 shtatorit 2023, kur Bunjaku mbeti i vrarë në një sulm terrorist.
Dy zyrtarët policorë, ishin dëshmitarët e radhës në gjykimin për sulmin në Banjskë të Zveçanit.
Peci tregoi se me të arritur ata tek kamionët barrikadues në hyrje të fshatit Banjskë, kishte dyshuar për një kurth.
“E kam vërejt se diçka nuk është në rregull. E kam vërejt se fshati shumë terr. Drita shumë rrallë. Rruga kah shkojshim na shumë ndriçim i fortë. Kur jemi afru tek kolegët tanë të kufirit të NJNSH-së, unë kam dyshu edhe kam thënë “Kolegë, po ç’kepëm, se mundet me kanë kurth”, ka thënë në dëshmin e tij, Elez Peci – zyrtar policor.
Mirëpo, pak çaste më vonë, ai do të ishte dëshmitar i shpërthimeve e sulmeve të shumta.
“Detonimi ka qenë aq i fortë, saqë ma ka humbë edhe balancën. Detonimi ka pasu me të shtëna armësh, të kalibrave të ndryshëm. Prej 7-62 e deri 12.7 tek gulinovi, ka pasë të shtëna armësh në drejtim tonin, në formë të hënës”, ka treguar ai.
Bashkë më Pecin, në një pozicion tjetër, në ato momente ishte edhe zyrtari policor, Avni Shala.
Ai rrëfeu momentin kur kishte kuptuar se rreshteri Bunjaku ishte qëlluar për vdekje.
“Kam arritur të kthehem tek vetura jonë, këmbë e duar. Dhe kam filluar të gjuaj zjarr në drejtimin që kam vlerësuar kundrejt sulmuesve. Pas disa momentesh jam kthyer me shikim kah barrikada, dhe e kam vërejtur një person të shtrirë”, tha Shala
Gjatë kësaj kohe, Shala kishte arritur të dëgjonte edhe sharje që vinin nga sulmuesit serbë.
“Pasi që detonimi dhe gjuajtjet nga anë të ndryshme, kryesisht nga fshati, kam dëgju më vonë sharje në gjuhën serbe dhe në të njëjtën kohë rafalle”, u shpreh ai.
Që të dy, Peci e Shala, kishin ndihmuar në tërheqjen e trupit të rreshterit Bunjaku, por që më pas, ishin kthyer në vendin e tyre të punës.
“Jemi kthyer prapë në stacion në Zveçan. Aty për ca kohë kam qëndru në sigurim të stacionit, pasi mendohej se mund të sulmohej”, tha polici Shala
Sulmi i 24 shtatorit, përgjatë dëshmive u vlerësua se ishte i mirëorganizuar dhe i financuar mirë, për shkak të armatimit që u përdor.
“Sulmi që ka ndodhë ndaj nesh, është sulm tipik ushtarak. I trajnuar fort mirë. Nuk jam ballafaqu asnjëherë në jetën tem me qasi sulmi. E qe besa, edhe i financum shumë mirë. Se armatimi që ka qenë, nuk mundet me u ble në treg. Është problem m’u ble në treg ai armatim. Domethënë është i financum, normal prej Serbisë.”, tha Peci
Gjykimi ndaj Blagoje Spasojeviq, Vladimir Toliq dhe Dushan Maksimoviq, do të vazhdojë edhe të premten.
