Shërbimi i Kërkim-Shpëtimit Malor i Kosovës ka njoftuar se të dielën në shkëmbinjtë e Liqenit të Jazhnicës në Malet e Sharrit është gjetur pa shenja jete një bjeshkatare gjermane.
Sipas SHKSHMK-së, dyshohet se gjatë ecjes në atë zone, viktimës aksidentalisht i kishte ngecur në një çarje mes shkëmbinjve dhe në pamundësi për të dalur dhe në pamundësi për të bërë thirrje për të kërkuar ndihmë, ka vdekur si pasojë e hipotermisë.
“Me datën 19.10.2025 kemi pranuar thirrje nga një grup i bjeshkatarëve për një aksident malor në afërsi të Liqenit të Jazhincës-Malet e Sharrit, të cilët kishin hasur afër shtegut kryesor në një trup që dyshohet të ishte pa shenja jete. Pas marrjes së informatave dhe koordinimit me Policinë e Kosovës Kosovo Police një skuadër e ShKShMK ishte nisur në drejtim të lokacionit. Ekipet e ShKShMK dhe të hetuesisë pasi që janë takuar dhe koordinuar te fillimi i shtegut për te Liqeni i Jazhincës nën udhëheqjen e ShKShMK ka filluar operacioni i kërkim-shpëtimit. Pas një marshimi në errësirë dhe kushte dimërore është arritur lokalizimi i viktimës në koordinatat e marra paraprakisht nga grupi i bjeshkatarëve. Sipas mekanizmit të aksidentit dyshohet se viktima shtetase Gjermane M.N gjatë ecjes malore e vetmuar në këtë zonë, aksidentalisht këmba i kishte ngecur në qarrje në mes të shkëmbinjëve dhe në pamundësi të daljes nga kjo situatë dhe thirrjes për ndihmë pasi që zona nuk ka mbulueshmëri me rrjet telefonik ,dyshohet të ketë pësuar me fatalitet nga kushtet atmosferike duke kaluar në hipotermi”, thuhet në njoftimin që ka shpërndarë ky shërbim.
Tutje kanë bërë të ditur se ky operacion i evakuimit ka zgjatur 9 orë të plota dhe se në këtë operacion ka asistuar edhe një ekip nga kompania e Kërkim-Shpëtimit të Forcës së Sigurisë së Kosovës.
Ndërkohë, FSK-ja kishte njoftuar më herët për përfundimin e këtij misioni, që e quajtën sfidues.
