Si shkak i ndërprerjes së energjisë elektrike, në administratën e Komunës së Podujevës janë dëmtuar disa hardisqe. Kështu thonë nga kjo komunë, mirëpo nga Lidhja Demokratike e Kosovës dega në Podujevë hedhin dyshime se mund të jetë djegur serveri ku ruhen të dhënat e qytetarëve.
Ndërprerja e energjisë elektrike i shkaktoi probleme Komunës së Podujevës.
Kjo pasi u djegën disa hardisqe në Administratën e kësaj komune.
Fillimisht, qarkulluan lajmet se është djegur serveri.
Por menjëherë reaguan nga Komuna duke i quajtur lajme të pavërteta.
“Për shkak të ndërprerjes së energjisë elektrike mëngjesin e së enjtes janë dëmtuar disa hardisqe të cilat janë të riparueshme dhe janë duke u riparuar. Nuk është e vërtetë në asnjë formë që është djegur serveri i Komunës së Podujevës ku mbahen të dhënat e Drejtorisë së Administratës, konkretisht të gjendjes civile ku ofrohen shërbimet për qytetarët sepse të dhënat zyrtare mbrohen nga Agjencioni i Regjistrimit Civil i cili është në kuadër të Ministrisë së Punëve të Brenshme”, tha drejtori i Administratës në Podujevë, Shuajb Blakçori.
Nga Lidhja Demokratike në këtë komunë po mendojnë ndryshe.
“Sipas informacioneve të brendshme thuhet se është djeg serveri përkatësisht i Drejtorisë së Administratës gjë që është tepër e rëndësishme pasi e dimë që në të ruhen të gjitha të dhënat dhe shërbimet që ofrohen gjatë gjithë kohës. Një reagim i komunës është se nuk është djeg serveri por kishte problem me disa hardisqe gjë që e konfirmon këtë pasi e dimë që serverët janë të ndërtuar me hardisqe”, tha asamblisti i LDK-së në Kuvendin Komunal të Podujevës, Qendrim Softolli.
Sipas Softollit, ndërprerja e energjisë elektrike është arsyetim banal pasi sipas tij, është dashur të mirren hapa konkret për parandalimin e dëmtimit të serverit.
