Prokuroria Speciale e Republikës së Kosovës, në bashkëpunim me Policinë e Kosovës, ka realizuar të hënën një bastisje në ambientet e Kompanisë Rajonale të Ujësjellësit “Gjakova” dhe në shtëpinë e Kryeshefit Ekzekutiv të kësaj kompanie, i cili është i dyshuar për disa vepra penale.
Sipas njoftimit zyrtar, operacioni është kryer në bazë të një urdhri të lëshuar nga Gjykata Themelore në Prishtinë, si pjesë e një hetimi të iniciuar për dyshime mbi keqpërdorim të pozitës zyrtare dhe vepra të tjera penale që lidhen me menaxhimin financiar dhe procedurat e prokurimit publik.
“Hetuesit nga Drejtoria për Hetimin e Krimeve Ekonomike dhe Korrupsionit, në koordinim me Prokurorinë Speciale, kanë kryer urdhrin e kontrollit në kuadër të hetimeve që janë duke u zhvilluar për të gjitha dyshimet që janë objekt i hetimit penal,” – thuhet në deklaratën e Prokurorisë Speciale.
Gjatë bastisjes, autoritetet kanë sekuestruar prova materiale – kryesisht dokumente – të cilat, sipas Prokurorisë, do të shërbejnë si prova relevante për rastin.
Ndaj zyrtarit të lartë të kompanisë janë duke u zhvilluar hetime për shkak të dyshimeve mbi këto vepra penale:
- Keqpërdorimi i pozitës apo autoritetit zyrtar
- Falsifikimi i dokumentit zyrtar
- Shmangia nga pagesa e tarifave të detyrueshme doganore ose akcizore
- Konflikti i interesit
- Keqpërdorimi dhe mashtrimi në prokurorim publik
“Prokuroria Speciale, në bashkëpunim me Policinë e Kosovës, është duke i ndërmarrë të gjitha veprimet e nevojshme hetimore, në përputhje me Kodin e Procedurës Penale të Republikës së Kosovës,” – përfundon komunikata.
Për momentin, nuk është bërë e ditur nëse janë ndërmarrë masa të tjera si ndalimi apo arrestimi i të dyshuarit. Hetimet janë në vazhdim.
