Vetëm gjatë mbrëmjes të së mërkurës ndodhën dy raste të vrasjeve në kryeqytet. Nga Policia e Kosovës treguan se që nga fillimi i këtij viti, në gjithë vendin kanë ndodhur 26 vrasje. E njohësit e fushës kërkojnë prezencë më të shtuar të policëve në terren.
Shenjat e krimit janë ende prezente.
Gjurmët se një vrasje ka ndodhur këtu në rrugën “Dalip Alshiqi” u panë edhe paraditen e së enjtes.
Disa orë pasi ndodhi ky rast, kryeqyteti u trondit edhe me një vrasje ku një 29 vjeçar goditi me thikë vjehrrin e tij 52-vjeçar i cili nuk arriti t’i mbijetojë plagëve të marra.
E nga Policia e Kosovës tregojnë vetëm numrin e rasteve të tilla që kanë ndodhur deri në muajin e dhjetë të këtij viti.
“Numri i vrasjeve për periudhën Janar – Tetor 2023 është 26″, thotë Policia.
E kjo dukuri po shihet si shqetësuese nga njohësit e fushës së sigurisë.
Madje vlerësohet se mungesa e zyrtarëve policorë në terren, është një stimulim për kriminelët që të kryejnë vepra të tilla.
Teksa, një ish-ushtarak tregon disa nga hapat që do duhej ndërmarrë nga institucionet e sigurisë, që sipas tij do të ndikonin në uljen e kriminalitetit.
Gjatë ditëve të fundit ka pasur edhe një numër të madh të vetëvrasjeve, e për të cilat ende nuk dihen rrethanat e këtyre rasteve.
