Policia e Kosovës të premten ka kontrolluar tri lokacione të ndryshme me dyshime për veprat penale “Keqpërdorim të detyrës zyrtare” si dhe “ Lëshimi i çeqeve pa mbulesë ose të rremë dhe keqpërdorimi i kartelave të banës apo kreditit”.
Sipas njoftimit të policisë, dy persona të dyshuar në këtë rast një femër dhe një mashkull janë arrestuar, pasi që dyshohet se kanë keqpërdorur kartelat bankare të disa personave dhe ua kanë tërhequr mjetet e përfituara nga skema pensionale.
“Policia e Kosovës hetimet për këtë rast i kishte filluar nga muaji korrik të vitit të kaluar me autorizim të Prokurorisë Themelore Pejë, me ç’rast janë aplikuar masat e veçanta të hetimit si dhe ka bërë grumbullimin e informatave të nevojshme, duke bashkëpunuar edhe me institucione tjera sipas kompetencës, përmes të cilave është arritur të sigurohen dëshmi të arsyeshme për veprat panele të cekura më lart. Dy (2) persona të dyshuar në këtë rast, një femër dhe një mashkull kosovarë, dyshohet se me qëllim të përfitimit të dobisë pasurore për vete kanë keqpërdorur kartelat bankare të disa personave dhe ua kanë tërhequr mjetet e përfituara nga skema pensionale. Tërheqja e parave dyshohet se ka ndodhur në vazhdimësi për disa muaj”, thuhet në njoftim.
Ndërkohë, gjatë kontrollit të lokacioneve, policia ka gjetur dhe sekuestruar gjashtë kartela bankare në emër të personave të tjerë, një telefon, si dhe një dokumentacion me rëndësi për procedurat hetimore.
Po ashtu, sipas policisë janë gjetur edhe dy armë zjarri, një AK-47 dhe një armë e shkurtër.
“Gjatë kontrollit të lokacioneve janë gjetur dhe janë sekuestruar dëshmi si në vijim: gjashtë (6) kartela bankare në emër të personave të tjerë, një (1) telefon, dokumentacion me rëndësi për procedurat hetimore. Gjithashtu janë gjetur dy armë zjarri, një AK-47 dhe një armë e shkurtër për të cilat pas konsultimit me prokurorin e rastit është iniciuar rast i veçantë. Personat e dyshuar janë intervistuar dhe me vendim të prokurorit janë dërguar në mbajtje deri 48 orë”, thuhet ndër të tjera./teve1.info/
