Shefja e Grupit Parlamentar të Lëvizjes Vetëvendosje, Arbërie Nagavci, u ka bërë thirrje për unitet dhe bashkëpunim deputetëve të Kuvendit të Kosovës, në një moment që ajo e cilësoi si të rëndësishëm për funksionimin institucional të vendit.
Nagavci theksoi se rifillimi i punës së Kuvendit pas vendimit të Gjykata Kushtetuese e Kosovës kërkon qartësi, seriozitet dhe përgjegjësi nga të gjithë përfaqësuesit e zgjedhur.
Ajo shtoi se në këtë fazë vendi ka nevojë për unitet dhe bashkëpunim politik, veçanërisht përballë proceseve të rëndësishme që e presin Kuvendin.
“Rifillimi i punës së Kuvendit pas vendimit të Gjykatës Kushtetuese është një moment që kërkon qartësi, seriozitet dhe përgjegjësi. Jemi rikthyer jo vetëm në formalitetin e rendit të ditës, por në thelbin e funksionit tonë si përfaqësues të qytetarëve. Kuvendi i Republikës është vendi ku merren vendimet, nuk ka asnjë adresë tjetër ku mund të zhvendoset kjo përgjegjësi. Në këtë fazë kemi nevojë për unitet dhe bashkëpunim”, tha ajo.
Duke folur për zgjedhjen e presidentit, Nagavci theksoi se bëhet fjalë për një proces kushtetues që kërkon pjekuri politike nga të gjithë deputetët.
Ajo përfundoi duke theksuar se përgjegjësia për funksionimin e institucioneve bie mbi vetë deputetët, të cilët sipas saj duhet të dëshmojnë seriozitet dhe përkushtim në këtë periudhë.
“Para nesh kemi një proces të rëndësishëm kushtetues, zgjedhjen e presidentit të Republikës, ku nga secila e secili prej nesh kërkohet pjekuri politike. Në emrin e çdo deputeti nënshkruhet serioziteti i këtij institucioni. Presidenti si figurë e unitetit të popullit thërret për proces që duhet të udhëhiqet nga bashkëpunimi. Përgjegjësia është e jona. Qytetarët presin nga ne që të marrim vendime”, u shpreh Nagavci.
