Janë pamjet nga kamerat e sigurisë të datës 2 korrik të vitit 2026.
Në to, janë kapur edhe lëvizjet e fundit të Xhafer Raçit.
Ky i fundit kishte rreth një orë, që ishte larguar pa njoftuar nga shtëpia e tij në Breg të Diellit në Prishtinë.
“Vëllai ka dalë me 02.07, diku 8:15 nga shtëpia. Edhe ka pirë një cigare me një kojshi, nuk ka dhënë shenja, domethënë që po del, a kupton? Edhe ka, nuk e kemi rrugën pak si më kryesore, se rruga ku banojmë aty është rrugë, përfundon aty, domethënë nuk ka dalje. Ka shkuar në rrugën ku ka dalë, Se në kohët e fundit, ai ka qenë gjithmonë me përcjellje, por atë ditë, ka rastisur për një moment, për dy tre minuta, djali deri sa u shkua me bo kafe, edhe ai kur ka ardhur ka dalë”, shprehet Beqir Raçi- vëllau i Xhaferit.
E nga kjo ditë, vëllai i Xhaferit, Beqiri, thotë se nuk dinë gjë për fatin e 78-vjeçarit që vuan nga sëmundja e demencës.
Kjo i shtyri që të mobilizohen për kërkimin e tij.
“Këtu është varri i Rugoves këtu ka dal prej shpisë, këtu ka hyp përmbi përmendore ka dal këtu në shteg dhe ka shku deri tek shkolla “Iliria”. Tek shkolla “Iliria” ka dal tek rruga ‘Dëshmoret e Kombit’.Ka shku deri te rruga e Tokgashqes dhe është kthy e ka njek rrugen deri tek xhamia dhe këtu ka dal. Kjo është deponia e dheut këtu është gjetur ulur”, thotw ai.
E deri më tani, përpjekjet për ta gjetur Xhafer Raçin nuk rezultuan të suksesshme.
Madje, së fundmi, kërkimet u ndërprenë edhe nga organet e rendit, deri në pranimin e ndonjë informate nga qytetarët.
Kjo ka shtyrë familjen Raçi, të shqetësohen për fatin e kryefamiljarit.
Për këtë, kërkojnë ndihmën e qytetarëve.
“Me trenerka të zeza, një parë papuqe, një maic me mangë të shkurta edhe një kapele të zezë. Flokët të bardha i ka. Mirëpo tash është kohë e gjatë dy jave. Ka mujt me ju rrit mjekra me i ra kapela. Mirëpo identifikimi i tij popullata mundet në sy e hundë. Në fytyrë ndoshta munden me identifikua”, shprehet Beqir Raçi.
Për gjetjen e Xhafer Raçit, ishin angazhuar edhe nga Shoqata e Kosovës për Kërkim Shpëtim.
Ndërsa në një përgjigje për Tëvë1, edhe nga kjo shoqatë thonë se kërkimet janë ndërprerë përkohësisht dhe do të rifillojnë sapo të pranohet ndonjë informacion i ri ose të identifikohet një pistë e re kërkimi.
Nga çdo person që posedon informacion lidhur me vendndodhjen e z. Xhafer Raqi ta njoftojë menjëherë Policinë e Kosovës ose Shoqatën e Kosovës për Kërkim Shpëtim në 192 apo 045-112-102.
