Edhe dy ditë, ka afat për t’u konstituuar ky institucion.
Kështu ka vendosur aktgjykimi i Gjykatës Kushtetuese që 26 korriku të jetë data e fundit për konstituim të Kuvendit të Kosovës.
Tentimi i 52-të me radhë është të premten.
Prej disa javësh, një marrëveshje po tentojnë ta bëjnë Lëvizja Vetëvendosje dhe Nisma Socialdemokrate.
Televizioni merr vesh që kryetarit të Nismës, Fatmir Limajt i janë ofruar tri pozita nga kreu i Vetëvendosjes, Albin Kurti.
“I është ofruar pozita e nënkryetarit të Kuvendit të Kosovës, një ministri dhe për zgjedhjet e ardhshme të jetë pjesë e listës së Lëvizjes Vetëvendosje”,
Por këto oferta të Kurtit i sheh vetëm sa për sy e faqe njohësi i zhvillimeve politike, Avni Arifi.
Ai është i bindur se kryeministri në detyrë dhe Limaj nuk do të arrijnë marrëveshje.
“Kjo nuk ka t’bëj me krijimin e Qeverisë, kjo ka të bëjë me kap për hune popullin e Kosovës dhe me en, kishe na po mundohemi me gjetë zgjidhje. Ai (Kurti) mundet me i marrë 80 vota për kryetar të Kuvendit se PDK-ja 38 deputetë ja voton, por nuk po don se nuk i ka votat tani për Qeveri, kështu cka bon? Ia shet e mashtron popullin e Kosovës kinse po bëj negociata me Fatmir Limajn po ai i ka 56 vota, me tri të Limajt janë 59. Pra cka ndodhë, në fund të javës thonë dështuan bisedimet nuk u morëm vesh dhe kalon afati tridhjetë ditor dhe ja kjo është situata, ka bë përpjekje për me kriju institucione pagun populli i Kosovës punë e madhe që i ka rrejt”, shprehet Arifi.
Në një konferencë për media të mbajtur në fillim të kësaj jave, Kurti deklaroi se deri në fund të javës do të merret vesh nëse do të arrihet marrëveshja.
Zyrtarë të lartë të Vetëvendosjes, në vazhdimësi kanë deklaruar se partia e tyre nuk do t’ia jap Fatmir Limajt pozitën që ai po synon, atë të kryetarit të Kuvendit.
