Ministri në detyrë i Infrastrukturës, Hysen Durmishi ka njoftuar lidhur me zhvillimin e punimeve në rrugën Prishtinë – Podujevë, duke bërë të ditur se 85% e punimeve në këtë projekt janë përfunduar.
“15% e mbetura përfshijnë ndërtimin e urave dhe nyjeve rrugore. Pas vendimit të fundit për shpronësim, tashmë është krijuar mundësia që punimet të zhvillohen edhe në këto pozicione. Me fillimin e sezonit të ndërtimit në pranverë, do të nisin punime intensive edhe në pjesët e mbetura, me qëllim që projekti të përfundojë sa më shpejt”, ka njoftuar ai në postimin e tij në Facebook.
Ai ka treguar se by-passi te ura, si pasojë e reshjeve të shiut ka krijuar disa gropa, të cilët kanë ngadalësuar qarkullimin e automjeteve gjatë orëve të pikut në mëngjes dhe mbrëmje.
“Sa i përket by-pass-it te ura, si pasojë e reshjeve të shiut janë krijuar disa gropa, të cilat kanë ngadalësuar qarkullimin gjatë orëve të pikut, në mëngjes dhe në pasdite nga ora 16:00 – 18:00. Megjithatë, komunikacioni nuk është ndërprerë në asnjë moment.
Në momentin që kam pranuar shqetësime nga qytetarët, kam dalë menjëherë në terren për ta parë nga afër situatën. Menjëherë kemi ndërhyrë duke i sanuar gropat dhe kemi vendosur makineritë përkatëse në terren, të cilat do ta përcjellin situatën dhe do të ndërhyjnë menjëherë sipas nevojës.
Duke pasur parasysh se ndodhemi në sezonin dimëror, pas reshjeve të shiut dhe borës, si dhe rënies së temperaturave nën zero, ngricat në rrugë janë të pritshme. Edhe pse rrugët janë mirëmbajtur dhe kanë qenë të pastruara në çdo kohë, kërkohet kujdes i shtuar në komunikacion dhe përshtatje e shpejtësisë me kushtet e rrugës”, ka thënë ai ndër të tjera.
Në fund ai ka cekur se me fillimin e sezonit të pranverës, do të nisin punime intensive edhe në pjesët e mbetura, me qëllim që projekti të përfundojë sa më shpejt./teve1.info/
