Enver Dugolli nga Lëvizja Vetëvendosje, ish-deputet i Kuvendit të Kosovës, shpreson se sa më parë do të arrihet marrëveshje në mes partive politike në mënyrë që të formohen institucionet.
Ai i ka komentuar takimet që po zhvillohen nga kryeministri në detyrë Albin Kurti, me krerët e partive të tjera.
“Takimet po bëhen për krijimin e institucioneve. Ne dëshirojmë të ecim mbarë e mirë dhe për këtë arsye janë bërë edhe ftesat nga ana jonë. Është koha që t’i formojmë institucionet. Partitë politike duhet të reflektojnë e ta gjejmë një figurë unifikuese për president. Uroj të këtë reflektim nga partitë politike opozitare. Ne edhe para zgjedhjeve kemi thënë se jemi të interesuar për formimin e institucioneve pasi me zgjedhje është dëshmuar se rezultati nuk ka ndryshuar shumë”, ka thënë Enver Dugolli për emisionin “Ditari” më tëvë1.
Ai vlerëson se refuzimet eventuale nga partitë janë të dëmshme për Kosovën.
“Secili takim është i mirëseardhur. Vetëm refuzimet e takimeve nuk janë të mira. Me takime përafrohen mundësitë për të arritur kompromis. Krejt çështja lidhet me presidentin. Për Parlamentin dhe Qeverinë ne i kemi numrat. Ftoj të gjithë të gjejmë mënyra të bashkëpunimit për të dal nga kriza”, theksoi Enver Dugolli.
Ndryshe, kryeministri në detyrë Albin Kurti, gjatë ditës është takuar me liderin e PDK-së, Bedri Hamza, kurse në mbrëmje do të takohet me atë të LDK-së, Lumir Abdixhiku.
Nga Aleanca kanë refuzuar që të takohen me Kurtin.
