Deputeti i Vetëvendosjes, Enver Dugolli ka thënë se draft-statuti i asociacionit i prezantuar sot nga organizata Friedrich-Ebert Stiftung përmban elemente të një asociacioni njëetnik
“Në parim, një asociacion i tillë njëetnik, nga ato që u paraqitën përmes mediave, është i panevojshëm, është edhe jo i dobishëm për shtetin e Kosovës, për qytetarët e Kosovës por edhe për qytetarët serb për shkak se me të thënë dikush cila e drejtë u mungon serbëve dhe me këtë Asociacion do të kompensoheshin këto të drejta”, ka thënë Dugolli.
Sipas tij serbët në Kosovë janë komuniteti më i diskriminuar pozitivisht në Evropë.
“Përkundrazi, çdo e drejtë të cilën një komunitet pakicë është e paraparë t’i ketë, në Kosovë lëre që i ka por ka diskriminim pozitiv, sepse asku nuk mund të gjeni një shembull as në Evropë e as në botë se një komunitet 4-5 % të ketë të drejta aq shumë, sa për ligje të veçantë që prekin funksionimin e shtetit dhe të drejtat e tyre kanë të drejtën e vetos”, ka shtuar ai në InfoNata në Tëvë 1.
Sipas Dugollit, Qeveria ka thënë në vazhdimësi se janë të interesuar që të flasin për të drejtat e serbëve, t’ua garantojnë ato por jo që Asociacioni të shndërrohet në diçka që do t’i kushtojë shoqërisë kosovare.
“Pakoja e Ahtisaarit ka qenë kompromis për shkak se shteti i Kosovës duhet të jetë shoqëri shumetnike dhe një asociacion njëetnik e prish frymën e shtetit dhe funksionimit të tij. Prandaj mendoj se nuk është nevojshëm dhe është i dëmshëm”, ka shtuar ai,
“Unë nuk e di pse insistojnë në një marrëveshje nga 33 të arritura në Bruksel, e që për shumicën Serbia as nuk do të dëgjojë për to e as nuk ka filluar t’i zbatojë ato”.
Duke folur për mospjesëmarrjen e nesërme të kryeministrit Kurti në diskutimin për asociacionin, Dugolli ka thënë se për këto çështje Kurti ka zhvilluar takime me zyrtarë si nga BE po edhe nga ShBA.
“Kryeministri Kurti i ka takuar përfaqësuesit e shteteve të rëndësishme edhe të BE-së edhe ShBA-së. Një takim i tillë në Ambasadën e ShBA-së nuk ka asgjë të keqe, thjesht ata duan të ndëgjojnë mendimet edhe të akterëve të shoqërisë civile. Por mendoj që edhe partitë politike edhe shoqëria civile besoj se e kanë parasysh se formimi i një asociacioni në vije etnike do të na bëjë një shtet jofunksional”, tha ai.
Ndërsa duke komentuar kërkesat e ndërkombëtarëve për themelimin e Asociacionit, Dugolli tha se ata mund të flasin me njerëz, parti e struktura të ndryshme, por se qytetari e ka dhënë verdiktin e tij.
“Ne në zgjedhjet që i kemi fituar më 14 shkurt askund VV-ja nuk ka thënë që do ta zbatojë marrëveshjen për themelimin e Asociacionit njëetnik serb. Ata që e kërkojnë themelimin e këtij Asociacioni le të flasin me njerëz, parti e struktura të ndryshme, por qytetari e ka dhënë verdiktin e tij. Nëse dikush prapa kamerave pretendon se ata do ta bënin Asociacionin, është mirë le të dalin edhe publikisht, por le të na tregojnë se në çfarë mënyre do ta bëjnë”.
Duke folur për mundësinë që të shkohet në zgjedhje, ai ka thënë se kanë një mazhorancë funksionale.
“Ne kemi mazhorancë stabile, e kemi funksionale, prandaj nuk shoh asnjë arsye dhe asnjë nevojë që të shkojmë në zgjedhje”, ka shtuar Dugolli.
