Dua Lipa dhe partneri i saj, aktori britanik Callum Turner, i kanë dhënë fund beqarisë me një ceremoni civile të organizuar në Londër, duke zgjedhur një festë intime dhe elegante larg vëmendjes së tepërt mediatike.
Megjithatë, përveç lajmit të martesës, ajo që ka bërë më shumë bujë është paraqitja e këngëtares shqiptare me famë botërore, e cila vendosi të largohej nga tradita klasike e fustanit të bardhë të nusërisë.
Për ditën e saj të veçantë, Dua u shfaq me një krijim luksoz të shtëpisë së modës Schiaparelli, të dizajnuar nga Daniel Roseberry.
Artistja zgjodhi një kostum elegant në nuancë fildishi, të përbërë nga një xhaketë e strukturuar që theksonte belin dhe një fund asimetrik modern, duke krijuar një kombinim që u vlerësua menjëherë nga ekspertët e modës.
Pamja u kompletua me doreza të bardha elegante, këpucë Christian Louboutin, bizhuteri Bulgari dhe një kapelë me strehë të gjerë, e cila i dha look-ut një prekje të sofistikuar dhe dramatike.
Sipas mediave ndërkombëtare të modës, zgjedhja e Dua Lipës duket se është frymëzuar nga një prej paraqitjeve më ikonike të historisë së nusërisë.
Në vitin 1971, Bianca Jagger u martua me Mick Jagger e veshur me një kostum të bardhë Yves Saint Laurent, duke sfiduar normat tradicionale të kohës dhe duke krijuar një trend që vazhdon të frymëzojë edhe sot.
Me interpretimin e saj modern të këtij stili legjendar, Dua Lipa ka arritur të ndërthurë elegancën klasike me estetikën bashkëkohore, duke e kthyer ceremoninë e saj në një nga ngjarjet më të komentuara të momentit në botën e modës dhe showbiz-it.
Ndërkohë, raportimet sugjerojnë se pas ceremonisë civile në Londër, çifti po përgatitet për një festë shumë më të madhe në Itali, ku pritet të marrin pjesë familjarë, miq të afërt dhe figura të njohura të industrisë së muzikës dhe modës.
Fansat tashmë po presin me kuriozitet paraqitjen e radhës të këngëtares, e cila duket se ka vendosur të surprizojë në çdo detaj të dasmës së saj.
