Klubi i futbollit Drita do të vazhdojë rrugëtimin e saj në garat evropiane, ku sot do të përballet me skuadrën malteze Floriana në kuadër të ndeshjes së parë të raundit të dytë kualifikues në Ligën e Konferencës.
Takimi zhvillohet në stadiumin “Centenary” në Ta’ Qali të Maltës, me fillim nga ora 19:30, derisa kjo sfidë konsiderohet një hap i rëndësishëm për skuadrën gjilanase drejt fazave të mëtejshme të kompeticionit.
Drita hyn në këtë përballje me synimin për të marrë rezultat pozitiv në ndeshjen e parë si mysafire, në mënyrë që të krijojë epërsi për duelin e kthimit, ku synon të dëshmojë edhe një herë potencialin e saj në arenën ndërkombëtare, duke u bazuar në përvojën e fituar në vitet e fundit në garat evropiane.
Nga ana tjetër, Floriana pritet të jetë një kundërshtar i fortë në fushën vendase, duke kërkuar të shfrytëzojë përkrahjen e tifozëve dhe terrenin për të dalë me rezultat pozitiv.
Atmosfera në prag të ndeshjes është optimiste në kampin e Dritës, ku synimi mbetet avancimi tutje dhe përfaqësimi dinjitoz i futbollit kosovar në skenën evropiane.
Ndeshja e kthimit do të zhvillohet një javë më vonë, ku pritet të përcaktohet skuadra që do të kalojë në raundin e tretë kualifikues.
