“Është sikur ta godasim murin me kokë”…” Nuk mund të jesh trajner i Dritës edhe të luash mbrojtje” këto janë vetëm disa nga paralajmërimet e trajnerit të Dritës para debutimit në Ligën e Konferencës.
Kampionia e Kosovës, debuton nesër në edicionin e ri të Ligës së Konferencës, ku do të përballet me skuadrën finlandeze KuPS.
Drita e cila e siguroi garën evropiane për herë të parë dhe pas shumë tentimeve, të enjten nga ora 18:45 përballet me finlandezët në stadiumin “Tammela” të qytetit Tampere.
Por përballë një rivali që nuk e njohin mirë, do të ndryshojë qasja dhe taktika e lojës së gjilanasve.
Kryetrajneri i “Intelektualëve”, Zekirija Ramadani, theksoi se ky kompeticion është risi për ta, por edhe një motiv shtesë si për të, po ashtu edhe për lojtarë.
Gjilanasit tashmë kanë mbërritur në Finlandë dhe janë të gatshëm për sfidën evropiane, por sipas Ramadanit, fokusi kryesorë do të jetë, përsëri Superliga.
Trajneri shkupjan foli edhe për kontingjentin e lojtarëve, dhe mungesat, por që për këtë ka paralajmëruar të gjithë në klub.
Ndërkohë, në kampionatin vendor, kampionët aktualë nuk po kalojnë në formë të mirë. Pas 7 xhirove të para në Superligën e Kosovës, Drita ka arritur vetëm dy fitore, ka dy barazime dhe ka pësuar tri humbje.
