Drenica dhe Trepça ’89 kanë arkëtuar pikë të plota në xhiron e tetë të Superligës së Kosovës.
Kuqezinjët fituan ndaj Prishtinës (2-1). Gjysma e parë e takimit të zhvilluar në stadiumin “Bajram Aliu” në Skënderaj nuk dhuroi gola.
Në fraksionin e dytë, ishin mysafirët ata që kaluan në epërsi me golin e Genc Hamitit (52’). Në minutën e 63-të, Leotrim Kryeziu ia doli ta fuste topin në rrjetë për avantazh të dyfishtë, mirëpo goli u anulua për pozitë jashtë loje.
Vendasit u angazhuan në minutat në vazhdim dhe ia dolën ta barazonin rezultatin përmes Zenel Gavazajt (79′. Nikoqirët e përmbysën rezultatin me golin e Armend Abazit nga penalltia në minutën e 85-të të takimit.
Prishtina mbetet në kuotën e 11 pikëve në vend të tretë, aq sa ka edhe Drenica një pozitë më poshtë.
Ndërsa në sfidën e zhvilluar në stadiumin “Riza Lushta”, Trepça ’89 e mposhti Dukagjinin me shifra 3:0.
Vendasit e zhbllokuan rezultatin që në minutën e 18-të me golin e Armend Gashit. Pas gjysmë ore lojë, nikoqirët e dyfishuan epërsinë me golin e Robert Rrahmanin nga pika e bardhë (30’).
Christian Mba e vendosi rezultatin përfundimtar të takimit duke shënuar golin e tretë për vendasit (88’). Pas kësaj fitoreje, Trepça ’89 është ngritur në kuotën e nëntë pikëve dhe mban vendin e katërt në renditje.
Ndërkaq, për Dukagjinin ishte humbja e gjashtë dhe kjo skuadër ndodhet në fund të tabelës me vetëm dy pikë nga dy barazime.
