Drejtori i Përgjithshëm i Policisë së Kosovës, Gazmend Hoxha ka pritur të enjten në një takim njoftues atasheun e ri ligjor të FBI-së, Brendan Collins, i cili siç thuhet mbulon Kosovën me seli në Sofje të Bullgarisë.
Në njoftimin e Policisë bëhet e ditur se, gjatë takimit është diskutuar për vazhdimin dhe thellimin e bashkëpunimit mes Policisë së Kosovës dhe FBI-së.
“Drejtori i Përgjithshëm deklaroi se ky bashkëpunim ka qenë gjithmonë i shkëlqyer dhe ka prodhuar rezultate të prekshme në fushën e sigurisë. Ai shprehu gatishmërinë e tij për të forcuar më tej këtë partneritet në të ardhmen”, thuhet në njoftim.
Sipas njoftimit, theks i veçantë është vënë edhe mbi bashkëpunimin në luftën kundër krimit të organizuar dhe fenomeneve të tjera me interes të përbashkët.
Në këtë vizitë, Collins thuhet se ishte i shoqëruar nga bashkëpunëtorë të FBI-së nga Sofja dhe përfaqësues të Ambasadës së SHBA-së në Kosovë.
