Drejtori i Përgjithshëm i Policisë së Kosovës, kolonel Gazmend Hoxha, ka pritur sot në takim zyrtar Drejtorin e Përgjithshëm të Policisë së Shtetit të Republikës së Shqipërisë, Drejtues Madhor Skender Hita.
Sipas njoftimit zyrtar, në këtë takim, të mbajtur në Prishtinë, Hoxha ishte i shoqëruar nga stafi i lartë menaxhues i Policisë së Kosovës, ndërsa Hita nga zyrtarë të lartë policorë të Shqipërisë.
I pranishëm ishte edhe ambasadori i Republikës së Shqipërisë në Kosovë, Petrit Malaj.
Gjatë takimit, Hoxha ka vlerësuar bashkëpunimin e ngushtë ndërmjet dy institucioneve, duke theksuar rëndësinë e koordinimit në funksion të sigurisë së qytetarëve dhe ruajtjes së rendit publik.
Ai ka prezantuar gjithashtu prioritetet strategjike dhe angazhimet e Policisë së Kosovës në luftimin e kriminalitetit dhe forcimin e sundimit të ligjit.
Në diskutime është theksuar edhe bashkëpunimi në luftën kundër krimit të organizuar dhe krimit transkufitar, si dhe rezultatet konkrete të arritura përmes shkëmbimit të informacioneve dhe operacioneve të përbashkëta.
Nga ana e tij, Hita ka falënderuar për mikpritjen dhe ka vlerësuar marrëdhëniet ndërmjet dy policive si një model bashkëpunimi të bazuar në besim dhe profesionalizëm.
Ai ka rikonfirmuar gatishmërinë për thellimin e mëtejshëm të bashkëpunimit në të gjitha fushat me interes të përbashkët.
Takimi ka përfunduar me zotimin e përbashkët për avancimin dhe zgjerimin e bashkëpunimit ndërmjet dy institucioneve policore në të ardhmen./teve1.info/
