Drejtori i përgjithshëm i kompanisë shtetërore serbe të telekomunikimit “Telekom Srbija” (MTS), Vladimir Luçiq, është filmuar duke marrë pjesë në një tubim të organizuar nga Partia Progresive Serbe (SNS), e udhëhequr nga Milosh Vuqeviq, nën direktivat e presidenti autokrat serb Aleksandar Vuçiq.
Pamjet tregojnë Luçiqin duke marshuar në mesin e mbështetësve të kësaj partie në Vozhdovac të Serbisë, përkrah vetë Vuçiqit dhe figurave tjera të larta të regjimit, si Sinisha Mali dhe Ana Brnabic.
Luçiq shihet duke buzëqeshur në turmë, teksa thirrej “Aco, Srbine”, por kur vëren kamerat, reagimi i tij ndryshon. Ai fillon të përsërisë “jo, jo, jo…”, duke lënë të kuptohet se nuk dëshironte të filmohej teksa ishte në atë tubim.
Gazetari dhe drejtori i lajmeve në TV Nova, Slobodan Georgiev, theksoi se ky është një konfirmim i asaj që është përfolur prej kohësh: se Luçiq është një “avatar i Vuçiqit” dhe se që nga marrja e detyrës në vitin 2018, qëllimi i tij ka qenë të shkatërrojë mediat e pavarura, në veçanti ato të United Group, si N1 dhe Nova S.
Ndërkohë, “MTS” është përfshirë edhe në një tjetër skandal në Kosovë, që lidhet me një nga autorët kryesorë të sulmit terrorist në Banjskë.
Një hetim i ekspertit të sigurisë Agim Musliu, ka zbuluar se Vladimir Radivojeviq, i njohur me nofkën “Mami”, ishte i punësuar nga “MTS” si shofer personal i drejtorit të kësaj kompanie në Kosovë, Zoran Millojeviq. Ai merrte një pagë mujore prej 1,246.26 euro dhe konsiderohet si një nga figurat kyçe të përfshira në organizimin e barrikadave në veri, si dhe në futjen e armëve nga Serbia në Kosovë.
Radivojeviq ishte pjesë e organizatave ilegale si “Mbrojtja Civile” dhe i lidhur ngushtë me strukturat e Listës Serbe. Në vitin 2021, ai ka qenë pjesë e një delegacioni që është takuar me Vuçiqin, në të cilin ishte premtuar “bërja e diçkaje të madhe”. Ky “premtim” u realizua më 24 shtator 2023, me sulmin e armatosur në Banjskë, ku mori pjesë përkrah Milan Radoiçiqit dhe anëtarëve të tjerë të grupit të armatosur.
Kompania “MTS”, nuk ka dhënë asnjë sqarim publik për punësimin e Radivojeviqit apo lidhjet me strukturat ilegale serbe në veri.
