Një dron i lëshuar nga Jemeni nga grupi militant Houthi ka goditur Aeroportin Ndërkombëtar Ramon në jug të Izraelit, duke detyruar mbylljen e hapësirës ajrore mbi rajonin jugor dhe ndërprerjen e fluturimeve, njoftoi ushtria izraelite të dielën.
Sipas Autoritetit të Aeroporteve të Izraelit, disa dronë u nisën nga Houthit, disa prej të cilëve u kapën jashtë territorit izraelit, por të paktën njëri prej tyre goditi sallën e pasagjerëve të aeroportit afër qytetit turistik Eilat. Një person u plagos lehtë nga copëzat e shpërthimit, sipas shërbimit izraelit të urgjencës Magen David Adom.
Zëvendëskreu i zyrës mediatike të Houthive, Nasruddin Amer, përshëndeti sulmin në rrjetet sociale, duke e quajtur “një operacion ushtarak të veçantë dhe cilësor”. Ai paralajmëroi se “aeroportet e armikut nuk janë të sigurta dhe të huajt duhet t’i largohen për sigurinë e tyre”, duke shtuar se “objektiva të tjerë të ndjeshëm janë nën sulm”, raporton AP.
Ky sulm vjen dy javë pas një sulmi izraelit në kryeqytetin Sanaa të kontrolluar nga rebelët, ku u vra kryeministri i qeverisë së Houthive, Ahmed al-Rahaëi, së bashku me disa ministra të tjerë. Al-Rahaëi ishte zyrtari më i lartë i Houthive i vrarë deri tani në fushatën ushtarake izraelito-amerikane kundër rebelëve të mbështetur nga Irani.
Pas vrasjes së tij, rebelët Houthi premtuan përshkallëzim të sulmeve ndaj Izraelit dhe anijeve që kalojnë përmes rrugës së rëndësishme detare në Detin e Kuq, pranë Jemenit. Së fundmi, Houthit kanë intensifikuar sulmet duke përdorur raketa dhe municione kasetore – të cilat shpërndajnë eksplozivë më të vegjël, duke e bërë më të vështirë kapjen e tyre nga sistemet mbrojtëse të Izraelit.
Aeroporti Ramon, i hapur në vitin 2019, ndodhet rreth 19 kilometra larg qytetit të Eilatit dhe shërben për fluturime të brendshme dhe ndërkombëtare, megjithëse është shumë më i vogël se aeroporti kryesor i Izraelit, Ben Gurion, pranë Tel Avivit.
Panika żydowskich pasażerów po jemeńskich uderzeniu na lotnisko #Ramon w #Ejlat na południu #Izrael. #Houthi nie zapominają o #Palestyna. pic.twitter.com/aBvJztAzjU
— Krystian Jachacy 🇵🇱 (@KrystianJachacy) September 7, 2025
