Një pjesë e partistë Lista Guxo, nuk po pajtohen asesi me faktin, që Lëvizja Vetëvendosje nuk e propozoi edhe për një mandat si Presidente, Vjosa Osmanin.
Pakënaqësitë ndërlidhen edhe me mungesën e reagimit nga krerët e partisë së tyre.
Prandaj, dorëheqjet nga Lista Guxo vazhduan edhe të premten.
Katër anëtarë të Degës së GUXO-s në Pejë, Nezir Jahmurataj, Ruzhdi Blakaj, Ramiz Cukaj e Feriz Gashi bën të ditur vendimin për largim nga të gjitha pozitat.
Madje, ata e akuzuan kryetaren e partisë, Donika Gërvallën, se loboi kundër rizgjedhjes së Osmanit.
“Është tepër shqetësues qëndrimi i znj. Donika Gërvalla, e cila ka lobuar kundër rizgjedhjes së Presidentes Osmani. Për ne është e papranueshme që brenda të njëjtit subjekt politik të mungojë përkrahja për një Presidente që ka dëshmuar integritet dhe përkushtim ndaj shtetit, si dhe ka bërë punë të jashtëzakonshme në politikën e jashtme.”
Sikur këta katër anëtarë të GUXO-s në Pejë, vepruan para pak ditësh edhe një pjesë e anëtarësisë së partisë në Deçan, si dhe deputeti Haxhi Avdyli.
Asnjë nga ta nuk pranuan të flasin para kamerës në lidhje me dorëheqjet e tyre
Për ish-deputetin e kësaj partie, Burim Meta, heshtja e dy kryetarëve Faton Peci dhe Donika Gërvalla, ka qenë e pritshme.
“Donika Gërvalla dhe Faton Peci nuk përfaqësojnë tërë partinë Guxo, pjesa më e madhe edhe e tërë strukturës dhe Këshillit mbi 95% nuk mendojnë ashtu siç mendojnë këta dy bashkëkryetar. Unë jam në takime dhe kontakte me strukturat dhe ata mendojnë ndryshe dhe dënojnë edhe këtë akt të heshtjes”, deklaroi Meta.
E sipas politologut, Albinot Maloku të dorëhequrit e Guxo-s, sërish lehtësisht mund t’i bashkohen Osmanit, varësisht të ardhmes politike të saj.
Tëvë1 ka provuar të marrë një qëndrim në lidhje me këto dorëheqje edhe nga vet Lista Guxo, mirëpo ata kanë qenë të paqasshëm.
