DokuFest ka shpallur përzgjedhjen zyrtare të filmave që do të garojnë në edicionin e 25-të jubilar të festivalit ndërkombëtar të dokumentarit dhe filmit të shkurtër.
Nga një numër rekord prej 3687 filmash të dorëzuar për shqyrtim, ekipi programues ka përzgjedhur 104 filma që do të konkurrojnë në tetë kategori të ndryshme.
Një pjesë e konsiderueshme e filmave në garë janë premiera botërore, ndërkombëtare dhe evropiane, duke e forcuar edhe më tej rolin e DokuFest-it si një nga platformat më të rëndësishme për promovimin dhe vlerësimin e dokumentarëve dhe filmave të shkurtër në rajon.
Sipas organizatorëve, përzgjedhja e këtij viti vazhdon traditën e festivalit për të sjellë filmat më të rinj dhe më të guximshëm të kinemasë bashkëkohore, duke trajtuar tema të rëndësishme sociale dhe globale.
“Me këtë përzgjedhje, DokuFest vazhdon traditën e sjelljes së filmave më të rinj dhe më guximtarë të vitit, duke trajtuar njëkohësisht disa nga çështjet më urgjente globale”, thuhet në njoftimin e festivalit.
Drejtori artistik i DokuFest-it, Veton Nurkollari, theksoi se filmat e këtij edicioni pasqyrojnë një botë të trazuar, ku autorët dokumentarë reagojnë ndaj krizave dhe ndryshimeve të mëdha shoqërore e mjedisore.
“Bota është në flakë dhe shumë kineastë i përgjigjen këtij momenti me filma që trajtojnë luftërat, shkatërrimin e komuniteteve, mbrojtjen e natyrës, militarizimin dhe ndryshimet klimatike”, u shpreh Nurkollari.
Ndërkaq, udhëheqësi i Programit të Filmit të Shkurtër në DokuFest, Samir Karahoda, tha se përzgjedhja e këtij viti sjell autorë që sfidojnë format tradicionale të rrëfimit dhe ofrojnë këndvështrime të reja mbi realitetin.
“Filmi i shkurtër mbetet një hapësirë ku autorët guxojnë të eksperimentojnë, të trajtojnë tema të ndjeshme dhe të vënë në pikëpyetje botën që na rrethon”, deklaroi Karahoda.
Në ditët në vijim, DokuFest pritet të publikojë edhe programet e tjera të festivalit, përfshirë seksionin “View from the World”, programin “Country in Focus”, juritë, diskutimet, masterclass-et dhe performancat muzikore.
Edicioni i 25-të i DokuFest-it do të mbahet nga 7 deri më 15 gusht në hapësira të ndryshme të qendrës historike të Prizrenit dhe në kinematë e Abi Qarshi.
