Rrugën këndej si i ri e frekuentoi për më shumë se 20 vite.
Por, në vitin 1999, pjesëtarë të ushtrisë serbe, e larguan dhunshëm nga banesa e tij këtu në rrugën që quhej “Ivo lola ribar”..
Për tu kthyer në të doktori i njohur, nga Mitrovica Shaqir Demiri priti plotë 26 vite, deri më 5 gusht të këtij viti.
Kjo pasi banesa e Demirit ishte e uzurpuar nga Zoran Arsic.
Në aksionin e policisë gjatë bastisjes për lirimin e banesës u gjetën edhe armë.
Në njërën nga dhoma, ishte edhe kjo fotografi që ka siguruar televizioni, e Arsicit me Millorad Dodikun, njeriun e afërt me presidentin serb, Aleksandër Vuçiq.
Por gjithë këto gjetje brenda banesës nuk e kanë befasuar doktorin, Shaqir Demiri.
“Nuk më ka çuditur që janë gjetur armë në këtë banesë për arsyeje siç e thash më herët pozicioni i kësaj banese është interesant, në të gjitha drejtime por është vendi kamufluar me pemë, ka qenë vend i zgjedhur për të” , thotë Demiri për Tëvë1.
Gjithë procesin e kthimit në shtëpi Demiri e sheh me emocione të mëdha.
“Në këtë banesë afër 20 vite këtu fëmijët për herë të parë e kanë shijuar ndjenjën e shtëpisë edhe të familjes kështu që kemi emocione të mëdha, edhe jam shumë i gëzueshëm edhe e falënderoj Policinë e Kosovës që na ka mundësuar të kthehemi në banesën tonë. Ky është rezultat i punës së vazhdueshme të qeverisë dhe policisë në këtë drejtim vetëm i falënderoj”, tregon ai.
Ai tregon momentin se si xhandarmëria serbe e kishin larguar nga banesa.
“ Më 28 mars 1999 kur ushtria, kanë qenë të uniformuar afër pesë, gjashtë veta kanë hyrë në banesë edhe nën kërcënimin e armëve, vetëm çanta të dorës që na kanë qëlluar, të gjitha gjërat tjera i kemi lënë jemi detyruar të largohemi nga banesa”, rrëfen doktori.
E shpresat sot do ktheheshin përsëri në banesë, Demiri thotë se kanë qenë të vogla pasi që edhe situata në veri më herët ka qenë e tensionuar.
“Nuk kemi pasë edhe shumë shpresë që do të kthehemi ndonjëherë për arsyeje të prolongimeve të paarsyeshme zgjatnin. Justifikime të pabaza, vetëm të mos kthehemi në banesat tona. Disa herë kemi bë kërkesë por në vesh të shurdhër” , shprehet ai.
Pas luftës, kjo familje nuk kishte pranuar që pronën e tyre t’ia shiste uzurpatorit.
“E falënderoj bashkëshorten e ndjerë, e cila ka qenë këmbëngulëse mos me shit edhe fëmijët, të gjithë kemi qenë një goje që banesën mos me shit, na është dukur si me dhënë një pjesë të trupit, për arsyeje se këtu jemi rritë këtu si familje jemi krijuar” , thotë
Por kjo nuk është banesa e vetme që ka Demiri.
Ai ka edhe një tjetër, e në të ka një histori të veçantë.
Pasi pikërisht brenda këtyre mureve kishte trajtuar edhe babain e Adem Jasharit, Shaban Jasharin i cili ishte rrahur nga policia serbe.
“ Kom emocione e kujtoj me nostalgji por në të njejtën kohë me krenari që i kom shërbyer një burri aq të madh të Kosovës. Lokacioni ka qenë këtu baca Shaban ka qenë këtu unë në atë pjesë një tavolinë ka qenë e vogël, pimë kafë edhe e kontrollova për arsyeje se ishte maltretuar shumë gjatë tërë natës në polici edhe kthehet këtu tek unë.Thash baca Shaban të paskan munduar shumë, ka qenë dashur të paraqitesh si i lodhur ose ose po të bjen të fikët, që të ndalen torturat, më këqyri në sy, pak në buzëqeshje tha, doktor Shaq ende nuk po na ngjofshme”,tregon ai.
Në fund, ai pati edhe një mesazh për qytetarët e Kosovës, ndërkaq shtoi se sot ndihen më të sigurt në pjesën veriore të vendit.
“Uroj te keni lajme të mira nga Mitrovica e Veriut sepse ky popull është shumë i stresuar nga paslufta ka pas vetëm lajme të këqija sidomos sirenat, kurse sot ndihemi shumë rehat”
