Dogana e Kosovës ka evidentuar një rast të mosdeklarimit të mjeteve monetare në Pikën Kufitare në Jarinje.
Sipas njoftimit, gjatë kontrollit të një automjeti në hyrje të Republikës së Kosovës, zyrtarët doganorë kanë pyetur udhëtarin nëse posedonte mallra apo mjete monetare për deklarim, por ai kishte deklaruar se nuk kishte asgjë për të raportuar.
Megjithatë, pas ekzaminimit të detajuar të automjetit dhe sendeve personale, janë gjetur mjete monetare të padeklaruara në vlerë totale prej 10 mijë e 173 euro e 60 centë, përfshirë euro dhe dinarë serbë. Paratë ishin të shpërndara në pjesë të ndryshme të automjetit dhe tek personi në fjalë.
Në përputhje me dispozitat ligjore në fuqi, rasti është proceduar tek njësitë kompetente dhe ndaj personit është shqiptuar gjobë administrative.
Për rastin është njoftuar edhe Hetuesia e Doganës, përmes së cilës është informuar Prokurori i Shtetit, ndërsa pjesa tjetër e mjeteve monetare mbetet e ndaluar deri në përfundim të hetimeve.
Dogana e Kosovës rikujton qytetarët dhe udhëtarët se deklarimi i mjeteve monetare gjatë hyrjes apo daljes nga territori i Republikës së Kosovës është obligim ligjor dhe mosrespektimi i këtyre dispozitave sjell pasoja administrative dhe ligjore./teve1.info/
