Dogana e Kosovës ka njoftuar se gjatë një kontrolli në pikën kufitare të Hanit të Elezit është zbuluar dhe sekuestruar një sasi municioni të dyshimtë.
Sipas komunikatës, ngjarja ka ndodhur gjatë kontrollit të një veture. “Fillimisht udhëtarët kishin deklaruar se nuk posedonin mallra për deklarim, por pas kontrollit nga zyrtarët doganorë, në hapësirën e bagazhit të automjetit është gjetur një pako e fshehur që përmbante 50 fishekë të kalibrit 9 milimetra,” thuhet në njoftim.
Autoritetet theksojnë se menjëherë pas gjetjes, municioni është konfiskuar. “Fishekët janë sekuestruar, ndërsa rasti i është dorëzuar Policisë së Kosovës për procedura të mëtejme ligjore,” thekson Dogana e Kosovës.
