Dogana e Kosovës ka njoftuar se të hënën në pikëkalimin kufitar në Jarinjë, gjatë një kontrolli rutinë të automjeteve që hynin në territorin e Kosovës, tek një shtetas i Serbisë kanë zbuluar dhe sekuestruar mjete monetare të padeklaruara në vlerë prej afro 20 mijë euro.
Siç bëhet e ditur në njoftim, paratë e sekuestruara të cilat nuk ishin deklaruar sipas rregullave doganore në momentin e hyrjes, përbëheshin kryesisht nga monedha në dinarë serb, ndërsa pjesa tjetër në valutën euro,
“Sipas legjislacionit të Republikës së Kosovës çdo shumë monetare mbi 10,000 euro që hyn ose del nga territori i vendit duhet të deklarohet pranë autoriteteve doganore. Mosdeklarimi i këtyre mjeteve përbën shkelje ligjore dhe i nënshtrohet procedurave administrative dhe ndëshkuese, si dhe hetimeve të mëtejshme”, thuhet në njoftim.
