Edon Zhegrova e fitoi prej minutës së 72-të rastin në ndeshjen e Juventusit ndaj Sportingut, të zhvilluar të martën mbrëma.
Pati disa momente të mira, por edhe disa momente jo shumë të mira. Rezultati nuk ndryshoi – mbeti ai 1:1 që ishte edhe para se të hynte sulmuesi kosovar.
Për 26-vjeçarin ishte paraqitja e parë që nga 13 tetori, kur luajti mbi 20 minuta për Kosovën ndaj Suedisë.
Për Kosovën luajti pak minuta edhe më 10 tetor ndaj Sllovenisë, ndërsa ndeshjen e kaluar për Juven e kishte më 27 shtator, ndaj Atalantas.
Trajneri i ri i Juventusit, Luciano Spalletti, vendosi t’ia jap rastin në ndeshjen e xhiros së katërt të Championsit dhe ka parë gjëra shumë pozitive. Por edhe është nervozuar.
“Më duhet të vazhdoj ta shikojë atë. Ajo është pozita e tij. Ai kthehet në anën e majtë, e mposht mbrojtësin e tij. Mënyra e lojës i mundëson të shohë kundërshtarin në sy. E njihja tashmë Zhegrovën, por isha i impresionuar nga shpejtësia e tij. Është shumë i shpejtë në hapësira të ngushta. Është i ndjeshëm me topin”, ka thënë Spalletti.
Pikërisht, ky trajner e ka kërkuar Zhegrovën edhe sa ishte te Napoli.
Zhegrova nuk ka luajtur shumë për shkak të gjendjes jo të mirë fizike, që ia solli mungesa e gjatë. Ai ende nuk ka sanuar plotësisht një lëndim në ije, që e mundon për rreth një vit.
“Nuk ka 90 minuta të plota, por me stërvitje do të rritet dhe do të na ofrojë zgjidhje”, është optimist Spalleti.
Gjatë ndeshjes, Zhegrova i pati edhe disa pasime jo të sakta.
“U zemërova me të sepse e humbi një pasim për Davidin dhe ua dhamë kundërshtarëve topin disa herë. Por është një performancë shumë e mirë. Tifozëria ishte e përfshirë dhe të gjithë mund të ndienin ndikimin e ekipit”, ka shtuar Spalletti, që është i vetëdijshëm për cilësitë e Zhegrovës.
Mediumi i afërt me Juventusin, “Tuttosport” e ka vlerësuar Zhegrovën me notën gjashtë.
“Menjëherë Hjulmand ndëshkohet me karton të vedhë. Ka jetë tek ai, por është e qartë se i duhen disa minuta për t’u rikthyer në formë të plotë”, ka komentuar ky medium.
