Organizata joqeveritare “Demokracia në Veprim” shpreh shqetësimin lidhur me incidentin që ndodhi në Skënderaj gjatë një aktiviteti të Lëvizjes Vetëvendosje, ku disa qytetarë përdorën mjete të forta dhe piroteknike, ndërsa energjia elektrike u ndërpre.
Në reagim thuhet se ky akt është një sulm ndaj lirisë së grumbullimit dhe shprehjes së lirë dhe sipas tyre krijon një atmosferë tensioni dhe pasigurie që është në kundërshtim me parimet themelore të demokracisë.
Tutje, thuhet se Demokracia në Veprim dënoi çdo formë dhune dhe provokimi gjatë procesit zgjedhor.
“U bëjmë thirrje të gjitha palëve që të angazhohen për një fushatë të qetë dhe dinjitoze, ku mbizotëron respekti dhe debati i argumentuar,” shtuan ata.
Po ashtu, kjo organizatë apeloi që subjektet politike të jenë të kujdesshëm në përdorimin e gjuhës dhe tonit, duke shmangur çdo lloj diskursi të ashpër që mund të krijojë tensione dhe të ndikojë negativisht te qytetarët dhe mbështetësit.
“Ftojmë qytetarët, përfaqësuesit politikë dhe sidomos mbështetësit e tyre të tregojnë maturi dhe përgjegjësi gjatë kësaj periudhe, duke kontribuar në një fushatë që promovon pjesëmarrjen të lirë dhe paqësore,” u tha nga Demokracia në Veprim.
DnV theksoi se zgjedhjet e lira dhe të drejta, si dhe një garë e barabartë, janë baza e një demokracie funksionale dhe se çdo akt dhune apo presioni dëmton këto vlera të rëndësishme.
