Kurti ka thënë se pas një pune intensive janë gjetur shkelje të shumta të dokumentuara në raportin përkatës, teksa ka akuzuar dy kompani përgjegjëse për sigurimin fizik dhe përgjegjëse për mbikëqyrjen e kamerave që kanë dështuar në kryerjen e punës, transmeton teve1.info.
“Njëherë me 19 gusht dhe pastaj sërish me 7 tetor iu dogj vetura Drejtorit të Njësisë së Auditimit të Brendshëm të ShSKUK-së, Musa Vitija. Pas një pune intensive të tij janë gjetur shkelje të shumta të dokumentuara në raport përkatës. Dy kompanitë, “Security Code”, përgjegjëse për sigurimin fizik dhe “Quantic”, përgjegjëse për mbikëqyrjen e kamerave kanë dështuar në kryerjen e punës së tyre. E para, sepse për herë të dytë nuk ka arritur të ofroj sigurinë e veturës së z. Vitija, kurse tjetra edhe pas dy jave nuk ka arritur t’i rikthej në funksion kamerat e sigurisë të cilat janë të dëmtuara nga “vetëtima””, ka shkruar Kurti.
Tutje Kurti theksoi se sot ka vizituar ShSKUK-në për të shprehur mbështetjen e tij, duke thënë se të korruptuarit dhe kriminelët zjarrvënës e kanë vendin në burg.
“Të korruptuarit dhe kriminelët zjarrvënës e kanë vendin në burg, e jo jashtë tij ku lirinë e përdorin si mundësi për të përsëritur krimin”, ka shkruar Kurti.
Bashkë me kryeministrin Kurti në vizitë ishte edhe ushtruesja e detyrës së ministres së Shëndetësisë, Dafina Gexha-Bunjaku dhe zëvendësministri, Arsim Berisha, ku janë takuar me ushtruesen e detyrës së drejtores së ShSKUK-së, Pranvera Zejnullahu- Raçi, Kryesuesen e Bordit Drejtues, Aida Rexhepi dhe Drejtorin, Musa Vitija.
Kujtojmë, që vetura e Drejtorit të Njësisë së Auditimit të Brendshëm të ShSKUK-së, Musa Vitija është djegur më 19 gusht dhe sërish më 7 tetor të këtij viti./teve1.info
