Në Ministrinë e Mbrojtjes është shënuar Dita Memoriale e Komunitetit Egjiptian, ku është theksuar roli dhe kontributi i pjesëtarëve të këtij komuniteti në Forcën e Sigurisë së Kosovës (FSK).
Në kuadër të kësaj dite, zëvendësministri i Mbrojtjes, Enis Kervan, është takuar me pjesëtarë të FSK-së nga komuniteti egjiptian, duke vlerësuar angazhimin e tyre të vazhdueshëm në zhvillimin e forcës dhe rritjen e kapaciteteve të saj.
Kervan ka theksuar rëndësinë e përfshirjes dhe përfaqësimit të të gjitha komuniteteve në institucionet e sigurisë së vendit, duke e cilësuar atë si element kyç për forcimin e FSK-së.
Gjatë aktivitetit janë ndarë mirënjohje për tre pjesëtarë të këtij komuniteti në shenjë vlerësimi për profesionalizmin dhe përkushtimin e tyre në detyrë.
“Me mirënjohje janë nderuar OR-6 Jetullah Mustafa, OR-5 Faik Zikollaj dhe OR-3 Leonit Muharremaj”, bëhet e ditur në njoftim.
Ministria e Mbrojtjes ka vlerësuar kontributin e përgjithshëm të komunitetit egjiptian në radhët e FSK-së, duke e cilësuar si të rëndësishëm për institucionin./teve1.info/
