Me rastin e shënimit të Ditës Botërore të Shëndetësisë, në Qendrën Kryesore të Mjekësisë Familjare në Prishtinë, ka filluar dita e parë e trajnimit të prindërve “ Kujdesi në grup për prindërim”.
Në këto trajnime, të cilat do të mbahen nga një takim në muaj, për shtatë muaj, nënat do të mund të ndajnë përvojën e tyre, eksperiencat, shqetësimet, por edhe këshilla nga infermieret, shkruan KP.
Shefja e zyrës së UNICEF-it në Kosovë, Veronika Vashchenko, si financuese e projektit, tha se në Kosovë mbetet shumë për t’u bërë rreth nënave dhe foshnjave të porsalindura.
“Prandaj, programe si vizitat në shtëpi duhet të zgjerohet, por edhe prindërit duhet të kenë më shumë njohuri për kujdesin ndaj fëmijëve, siç është edhe sesioni i sotëm që shpresojmë të zgjerohet. UNICEF është i përkushtuar të vazhdojë punën tonë për fëmijët me të gjithë partnerët në Kosovë për mirëqenien e fëmijëve”, tha ajo.
Ndërsa, drejtori i shëndetësisë në komunën e Prishtinës, Izet Sadiku, shtoi se përmes këtij programi, i cili është i treti që i kushtohet kësaj kategorie, drejtoria dëshiron që t’i forcojë programet për nënat dhe fëmijët.
“Është programi i tretë që i kushtohet kësaj kategorie. Ka për qëllim ngritjen e kapaciteteve për gratë, nënat dhe fëmijët. Përmes këtyre projekteve, ne dëshirojmë që t’i forcojmë programet për nëna dhe fëmijë, për arsye se sot në botë konsiderohet që fatkeqësisht, vdesin 300 mijë gra gjatë shtatzënisë në vit dhe dy milion fëmijë të porsalindur dhe dy milion gjatë lindjes. Përmes këtyre programeve dhe përkrahje që përbën UNICEF dhe MSH-ja ne kemi arrit t’i krijojmë kapacitetet për këto tri programe”, shtoi Sadiku.
E për fund, kryetari i kryeqytetit, Përparim Rama u shpreh se ky program do të ndikojë tek nënat në aspektin psikik dhe fizik.
“Sot është ditë e parë e trajnimit të prindërve, për me i trajnua se si duhet me u kujdes për fëmijët e tyre, ose për informata shtesë të cilat iu nevojitën, që ta kenë një periudhë kohore sa më të shëndoshë, në aspektin psikik dhe fizik edhe për foshnje por edhe për prindërit. Ky është një proces qe ne e kemi filluar parë dy vitesh me vizita nëpër shtëpi që prindërit kanë foshnje të sapolindura, e po ashtu edhe me trajnime për nënat shtatzëna që kemi filluar para një viti, me i trajnua jo vetëm nënat por edhe babatë”, u shpreh Rama.
Ky program për kujdesin e prindërve dhe foshnjave, është një bashkëpunim mes Komunës së Prishtinës dhe UNICEF-it.
