Është dita e pestë që po qëndron Qendrën e Paraburgimit në Suboticë.
Ish polici i Njësisë Operative Speciale të Policisë së Kosovës, Arbnor Spahiu po akuzohet nga Beogradi për “vrasje të rëndë” në Banjskë të Zveçanit.
Pavarësisht që avokati i tij, Arianit Koci, tha që Spahiu nuk ka qenë pjesë e policisë në vitin kur ka ndodh sulmi në Banjskë, ai po vazhdon të mbahet brenda grilave nga autoritetet serbe.
Në lëvizje për lirimin e Spahiut, është vënë shteti i Kosovës.
Kryeministri në detyrë, Albin Kurti po thotë se janë duke punuar që Spahiu të kthehet në shtëpi.
“Prej momentit të arrestimit të shtetasit tonë, Arbnor Fatmir Spahiu, nga autoritetet serbe në pikën kufitare Hungari-Serbi, institucionet tona janë angazhuar maksimalisht që ai të lirohet sa më parë. Sjellja jonormale e Serbisë ndaj qytetarëve të Republikës së Kosovës, nuk duhet dhe nuk do të pranojmë të normalizohet”, wshtw shprehur Kurti.
Për lirimin e tij, është angazhuar edhe shefja e shtetit, Vjosa Osmani.
“Serbia duhet të ndalë menjëherë fushatën e saj të arrestimeve politike kundër qytetarëve të Kosovës dhe të mbahet përgjegjëse ndërkombëtarisht për veprimet e saj arbitrare. Këto veprime jo vetëm që pengojnë lirinë e lëvizjes, por edhe rrezikojnë çdo përpjekje për dialog e normalizim të marrëdhënieve .Gjatë ditëve të fundit, përveç kontakteve të vazhdueshme me Zyrën Ndërlidhëse të Republikës së Kosovës në Beograd, kemi kërkuar edhe reagimin e fuqishëm të shteteve të Quint-it dhe Misionit të BE-së, në mënyrë që këto shkelje të të drejtave të njeriut nga ana e Serbisë të mos injorohen”, ka shkruar Osmani.
E Zyra Ndërlidhëse e Kosovës në Serbi ka dorëzuar menjëherë kërkesë zyrtare për lejimin e vizitës së Ambasadorit Jetish Jashari tek z. Spahiu në Qendrën e Paraburgimit në Suboticë.
“Ministria e Punëve të Jashtme dhe Diasporës, përmes Zyrës Ndërlidhëse në Beograd, ka njoftuar për rastin misionet diplomatike të vendeve të Quint-it të akredituara në Beograd, dhe të gjithë Trupin diplomatik në Kosovë. Në mënyrë të veçantë, po mbahet komunikim i rregullt me Ambasadën e Republikës Federale të Gjermanisë, duke marrë parasysh se z. Spahiu ka qëndrim të rregullt në Gjermani.Republika e Kosovës do të vazhdojë të shfrytëzojë të gjitha kanalet diplomatike në dispozicion për të siguruar që kjo padrejtësi e radhës ndaj një shtetasi të Republikës së Kosovës të marrë fund, dhe që z. Spahiu të lirohet sa më parë”, thuhet nga MPJD.
Arbnor Spahiu u arrestua nga autoritet e Serbisë më 7 qershor. Ai ishte duke udhëtuar nga Austria me familje dhe i njëjti që nga viti 2022 jeton në Gjermani.
