Sot, është dita e gjashtë prej kur minatorët e minierës së “Trepçës” kanë hyrë në grevë.
Gjatë natës, gjendja shëndetësore e minatorëve është rënduar, ku nëntë persona kanë kërkuar ndihmë mjekësore, e katër prej tyre janë dërguar në emergjencë.
Nënkryetari i Sindikatës së minatorëve të Trepçës, Destan Kërleshi, për teve1.info ka bërë të ditur se njëri nga minatorët është ende duke u trajtuar.
“Ju njoftoj se gjendja shëndetësore e minatorëve është rënduar shumë dhe gjatë natës kanë kërkuar ndihmë mjekësore 9 minatorë, 4 prej tyre në gjendje më të rëndë, dhe 1 mbetet ende në emergjencë për trajtim mjekësor. Kemi hyrë në ditën e gjashtë të grevës, minatorët kërkojnë çdo minutë ndihmë mjekësore. Qeveria hesht!”, tha Kërleshi.
Minatorët po kërkojnë realizimin e pagës mujore me kohë, sigurimin e kushteve të punës. Për këto kërkesa ata po kërkojnë garanci me shkrim.
Për një ditë mospunë në Minierën e Trepçës, humbjet llogariten të kapin vlerën e 40-50 mijë euro./teve1.info/
