Tash e disa ditë kompanitë që kanë më pak se 50 punëtorë është dashur të dëshmojnë një gjë të tillë në KESCO.
Kjo pasi nga 1 qershori, kompanitë të cilat kalojnë këtë numër të punonjësve do të kalojnë në treg të hapur për t’u furnizuar me energji elektrike.
Por shumë prej këtyre bizneseve duke dërguar dëshmitë për të vazhduar me tarifa të rregullta të energjisë elektrike, kanë shkelur privatësinë e punëtorëve të tyre.
Pasi këto kompani kanë shpërndarë në KESCO të dhënat personale të punëtorëve, si emri mbiemri e numrin e letërnjoftimit.
Pas kësaj është vënë në lëvizje Agjencia për Informim dhe Privatësi.
“Kemi pranuar disa njoftime nga ana e bizneseve menjëherë për shkak të ndjeshmërisë kemi filluar takimin me ZRRE-në, me KEDS-in dhe ATK-në, për të parë se cili është qëllimi i grumbullimit të këtyre të dhënave . Kemi pasur një takim me kompaninë KESCO-se të njëjtit na kanë treguar se nuk kanë kërkuar nga bizneset listat e punëtorëve por vet bizneset kanë dërguar këto lista të punëtorëve me të dhënat personale ë punëtorëve”, ka thënë Arbian Arifi nga kjo agjenci.
E nga KESCO tregojnë masat që kanë ndërmarrë në momentin që kanë pranuar të dhëna që nuk iu janë kërkuar bizneseve.
“Ne kemi kërkuar nga kompanitë të na dërgojnë dëshmitë vetëm për numrin e punëtorëve dhe qarkullimin vjetor, siç është përcaktuar në legjislacionin në fuqi. Por, në momentin që kemi filluar të pranojmë të dhëna përtej asaj që kemi kërkuar, atëherë ne kemi bërë thirrje të vazhdueshme që konsumatorët t’i hijezojnë të dhënat e tyre personale”, ka thënë zëdhënësja në KESCO, Margartita Rashiti.
Bizneset kanë pasur kohë deri më 21 mars t’i dërgojnë në KESCO dokumentet që vërtetojnë se kanë deri në 50 punëtorë ose jo më tepër se 10 milionë euro për të qëndruar si konsumatorë në KESCO me tarifa të rregulluara.
