Dha mesazhe të qarta sa i përket procesit të dialogut mes Kosovës dhe Serbisë.
Administratorja e Agjencisë Amerikane për Zhvillim Ndërkombëtar, Samantha Power, në një konferencë të përbashkët me kryeministrin e Kosovës, Albin Kurtin, deklaroi se dialogu duhet të përfundojë me njohje të ndërsjellë.
Power, bëri të ditur se SHBA-ja asnjëherë nuk ka lëvizur nga ky qëndrim.
“Fokusi ynë është në implementimin e kornizës së plotë të normalizimit. Gjithmonë ka qenë pozicioni i ShBA-ve që kjo duhet të përfundojë me njohje reciproke dhe ky mbetet qëndrimi ynë. Por tani fokusi ynë është në rëndësinë e Asociacionit dhe rëndësinë që serbët e Kosovës të kthehen në institucionet e Kosovës sa më parë që të jetë e mundur”, tha Power.
Megjithatë, ajo tha se Kosova duhet ta trajtojë me urgjencë çështjen e themelimit të asociacionit të komunave me shumicë serbe.
“Si përfaqësuese e lartë e Administratës Biden kam ardhur të përforcojë mesazhin për rëndësinë e implementimit të marrëveshjeve, të cilat do të prodhojnë një normalizim, i cili do të jetë tej mase i rëndësishëm për Kosovën dhe Serbinë. Normalizimi do të jetë shumë i mirë dhe dobishëm edhe për biznesin. Kemi pasur diskutime edhe për urgjencën e krijimit të Asociacionit, por edhe zbatimit të plotë të gjitha aspekteve të marrëveshjes. Ne e kemi bërë shumë të qartë përmes zotëri Chollet dhe Escobar se cilat janë parimet dhe po ashtu besojmë se çdo asociacion do t’iu përmbahet atyre kushteve”, shtoi ajo.
Kurse, shefi i ekzekutivit kosovar, Albin Kurti, tregoi detaje se për çfarë do të diskutohet me palën serbe në takimin e ardhshëm në Bruksel.
Kurti refuzoi të japë një përgjigje nëse në takimin e së hënës të kryenegociatorëve do të bisedohet për urën mbi lumin Ibër në Mitrovicë.
Kronika e gazetarit Shpat Blakçori.
