Futbolli i Shqipërisë nuk do ta ketë asnjë përfaqësues në fazën e ligës të njërave prej tri garave të UEFA-s për sezonin 2025/26.
Dinamo City, si ekipi që mbijetoi më së gjatë në fazat kualifikuese të garave evropiane, është eliminuar në “play-off” të Ligës së Konferencës.
Skuadra nga Tirana është eliminuar nga Jagiellonia e Polonisë, e cila siguroi Ligën e Konferencës me rezultatin e përgjithshëm 4:1.
Pas triumfit 3:0 në ndeshjen e parë të luajtur javën e shkuar në Poloni, Jagiellonia të enjten mbrëma barazoi 1:1 në përballjen e kthimit ndaj Dinamos, të luajtur në Tiranë.
Dejvi Bregu shënoi golin e vetëm në të dyja ndeshjet për Dinamon, ekip që në duelin e kthimit ishte në epërsi prej minutës së 62-të.
Përkundër këtij elimini, Dinamo nën drejtimin e Ilir Dajës ka treguar paraqitje të mira në Evropë dhe ka paralajmëruar rikthim të fuqishëm në skenën e futbollit shqiptar.
