Qytetarit të nacionalitetit serb, Bojan Bozovic, persona të panjohur ia dogjën veturën e vetme, që e kishte të parkuar para shtëpisë së tij në Zubin Potok.
Megjithatë, mbërritja e shpejtë e zjarrfikësve ndaloi që zjarri të përhapej edhe në shtëpinë e tij.
Aktit iu përgjigjën edhe njësitet policore të Zubin Potokut.
Përmes një komunikate policia ka bërë të ditur se është përkushtuar në ndriçimin e këtij rasti.
“Policia e Kosovës mbetet e përkushtuar në realizimin e detyrave dhe përgjegjësive të saja ligjore, në hetimin dhe zbardhjen sa më parë të këtij rasti dhe të rasteve të tjera të zjarrvënieve, të ndodhura dhe të orientuara ndaj pronave private, kryesisht ndaj veturave të regjistruara me targa lokale RKS”, thuhet në komunikatën e policisë.
Prej shtatorit të këtij viti, janë shënuar pesë raste të djegies së veturave të qytetarëve të nacionalitetit serb, të cilët kishin vendosur në to targa të ligjshme.
Sipas njohësit të çështjeve të sigurisë, Sheqir Kutllovci këto akte mund të jenë të porositura nga Serbia dhe institucionet duhet të veprojnë pa humbur kohë.
“Unë mendoj që numri më i madh e pranojnë realitetin por ka një numër i vogël që janë të instrumentalizuar prej Serbisë. Tash investimet prej Serbisë brenda janë të mëdha. Tash ky investim, ai nëse e merr një pagesë, duhet të reagojë dhe argumentojë atë pagesë”, tha ai.
Kutllovci shton se këto akte mund të jenë demotivim për serbët që planifikojnë t’i konvertojnë targat ilegale në ato të ligjshme.
Prej të martës ka nisur faza e qortimit për personat që vozisin vetura me targa ilegale të lëshuara në Serbia. Që nga 21 nëntori bartësit e targave ilegale do të gjobiten me 150 euro.
Kronika e gazetarit Gojart Jashari.
