Në Qendrën e Numërimit dhe Rezultateve, të shtunën ka përfunduar numërimi i votave nga diaspora, me kusht dhe atyre me nevoja të veçanta.
Në bazë të rezultateve për balotazhin e zgjedhjeve lokale, nuk ka ndryshime të theksuara.
Në Prishtinë, Hajrulla Çeku i Lëvizjes Vetëvendosje mori 82 vota me kusht, ndërsa Përparim Rama i Lidhjes Demokratike të Kosovës pati 54.
Në votat me nevoja të veçanta, Rama pati 108 vota, ndërsa Çeku 68. Nga diaspora, kandidati i LVV-së mori 395 vota, kurse kryetari aktual i kryeqytetit 168.
Në total, Rama është i pari me rreth tre mijë vota.
E ndryshime nuk pati as në Mitrovicë të Jugut. Në votat me kusht, prin Faton Peci i LVV-së me 70 vota, teksa Arian Tahiri i Partisë Demokratike të Kosovës mori 39.
Nga diaspora, Peci ka 298 vota, ndërsa Tahiri 126.
Kështu në bazë të rezultateve, Peci do ta udhëheqë këtë komunë për katër vjet.
Kurse në Gjilan, kryetari Alban Hyseni, ka thelluar fitoren edhe me votat e diasporës.
535 mërgimtarë votuan për Hysenin, derisa 208 prej tyre, sipas rezultateve të KQZ-së, votuan Arbër Ismajlin e LDK-së.
Ndërsa kandidati më i votuar nga diaspora në rundin e dytë të zgjedhjeve lokale doli të jetë Bexhet Xheladini, kryetari i Dragashit.
E në këto pako me fletëvotime, nuk janë numëruar ende ato nga SHBA, Kanadaja dhe Australia.
“Për shkak të largësisë, ende nuk janë sjellur në Kosovë 519 pakot me fletëvotime nga kutitë postare në ShBA, Kanadë dhe Australi, vlerësimi dhe numërimi i të cilave do të bëhet pasi të arrijnë”, tha Elezi.
Zëdhënësi i KQZ-së gjithashtu tregoi që jo të gjitha pakot me fletëvotime kanë arritur të kalojnë fazën e verifikimit.
“Nga procesi i vlerësimit të 12,018 pakove me fletëvotime që janë sjellur deri më tani në vendin tonë, janë aprovuar 8,932, ndërkaq janë refuzuar 3,086. Arsyeja më e shprehur se përse janë refuzuar këto pako është sepse në 3,009 raste mungon dëftesa e regjistrimit, një dokument me të dhëna unike, që votuesi i regjistruar e pranon nga KQZ”.
Numri i shtetasve të regjistruar për të votuar përmes postës dhe që i takonin 18 komunave është 29,752.
Kronikë e realizuar nga gazetarja, Jona Kelemendi.
