Presidenti i Këshillit Evropian, António Costa, ka bërë thirrje që Kosova dhe Serbia të përqendrohen te e ardhmja dhe dialogu, duke theksuar se Bashkimi Evropian është ndërtuar mbi tejkalimin e konflikteve historike.
I pyetur për mungesën e takimeve të nivelit të lartë në kuadër të dialogut Kosovë-Serbi që nga sulmi terrorist në Banjskë, si dhe për faktin se Milan Radoiçiq vazhdon të qëndrojë në Serbi, Costa tha se përvoja evropiane dëshmon se konfliktet mund të tejkalohen përmes bashkëpunimit dhe vizionit për të ardhmen.
“Bashkimi Evropian është një projekt paqeje. Ai ka lindur nga hiri i Luftës së Dytë Botërore. Franca dhe Gjermania vendosën ta tejkalojnë historinë e tyre dramatike dhe të përqendrohen në një të ardhme më të mirë dhe më të begatë. Kjo është historia e Bashkimit Evropian dhe kjo duhet të jetë edhe e ardhmja e Evropës”, deklaroi Costa.
Sipas tij, edhe vendet e Ballkanit Perëndimor kanë kaluar periudha të vështira dhe mosmarrëveshje me fqinjët, por fokusi duhet të jetë te ndërtimi i një të ardhmeje të përbashkët.
“Duhet të vendosim se çfarë dëshirojmë: të ndërtojmë vlera dhe një të ardhme të përbashkët, apo të mbetemi të përqendruar te konfliktet e së kaluarës. Duhet të fokusohemi te e ardhmja. Të njëjtën gjë që po e them këtu do ta them edhe në Beograd”, tha ai.
Costa theksoi se përfshirja e Bashkimit Evropian në dialog mbetet thelbësore, por shtoi se edhe Kosova dhe Serbia duhet të angazhohen me vullnet të mirë në proces.
“Është e rëndësishme që BE-ja të jetë e përfshirë në këtë dialog, por është po aq thelbësore që edhe Beogradi dhe Prishtina të angazhohen me besim të mirë dhe të përqendrohen te e ardhmja”, përfundoi ai.
