Të shtëna me armë zjarri ka pasur mbrëmjen e së premtes në lagjen “Bregu i Diellit” në Prishtinë.
Zëdhënësja e Policisë së Kosovës, Flora Ahmeti, ka bërë të ditur se nga ky rast nuk ka persona të lënduar.
Ndërkohë, njësitë relevante policore kanë dalë menjëherë në vendin e ngjarjes tha Ahemti, derisa shtoi se edhe hetimet për këtë rast tashmë kanë filluar.
“Rreth orës 17:30 kemi marrë informatën për të shtëna me armë zjarri, në lagjen Bregu i diellit në Prishtinë. Njësitet policore menjëherë kanë dalë në vendin e ngjarjes, nuk raportohet për persona të lënduar. Aktualisht hetuesit policor kanë nisur një hetim lidhur me rrethanat e këtij rasti”, ka deklaruar Flora Ahmeti.
Lidhur me rastin, policia në vendin e ngjarjes ka gjetur dhe konfiskuar 8 gëzhoja të cilat dyshohet se janë shkrepur nga persona të panjohur nga një veturë dhe një motoçikletë.
Sipas policisë, të dyshuarit kanë ikur nga vendi i ngjarjes.
“Rr. Isa Kastrati, Prishtinë 27.06.2025 – 19:30. Njësitet policore pas pranimit të informatës lidhur me rastin, kanë dalë në vendin e ngjarjes dhe aty kanë gjetur e konfiskuar 8-gëzhoja të cilat dyshohet se janë shkrepur nga persona të panjohur nga një veturë në njërën anë dhe një motoçikletë në anën tjetër, të cilat pastaj kanë ikur në drejtim të panjohur. Nuk raportohet për të lënduar, ndërsa njësitet policore janë duke hetuar rastin për të cilin është informuar edhe prokurori”, thuhet në raportin policor./teve1.info/
