Të dielën një pastiçeri në sheshin “Car Llazari”, ishte cak i sulmeve.
Persona të panjohur thyen derën e lokalit, e brenda saj hodhën koktej molotovi.
Të premten në këtë pastiçeri, ministrat Xhelal Sveçla e Elbert Krasniqi, u pritën nga kryetari i Mitrovicës së Veriut, Erden Atiq.
E pija e përbashkët e tyre, ishte limonada.
Për shkak të sigurisë, pronarët e lokalit nuk kanë pranuar të flasin para kamerës. Por prapa saj i thanë televizionit që sulmi ndodhi në orët e para të mëngjesit dhe askush nga stafi nuk u lëndua.
Rastin e kanë konfirmuar edhe në Policinë e Kosovës.
Por këta thonë se deri më tani nuk ka persona të dyshuar.
“Rreth orës 03:30 ka pas tentim zjarrvënie në Mitrovicën e Veriut. Dëme të vogla materiale janë shkaktuar. Për momentin nuk kemi të dyshuar, ndërsa policia po punon në drejtim të ndriçimit të rastit”, ka thënë Veton Elshani, zëvendësdrejtori i Policisë së Kosovës për rajonin e veriut.
Ndërkohë eksperti i sigurisë nga ky qytet, Arben Dashevci, thotë për Tëvë 1 se gjendja në katër komunat veriore, vazhdon të jetë e qetë, por e brishtë.
“Gjithmonë do të ekzistojnë copëza kriminale matanë lumit Ibër, duke e pasur parasysh se çfarë kemi kaluar ne. Pra e kemi kaluar 24 shtatorin, gjithmonë do të ketë tentim destabilizimi të Republikës së Kosovës, edhe më këtë tentim zjarrvënie ose edhe me diçka tjetër nesër, nuk duhet të befasohemi, me rëndësi që situata në aspektin e brendshëm është e qetë, nuk ka incidente etnike, por të themi se jemi komod, kur je në të portokalltën kjo kërkon vigjilencë të paparë deri me sot”, ka thënë ai.
Këtë sulm e ka dënuar edhe ministri i Punëve të Brendshme, Xhelal Sveçla.
Përmes llogarisë në Facebook, Sveçla tha se rendi e ligji do të triumfojnë me çdo kusht mbi terrorin.
