Presidencës i dështuan shumica e takimeve rreth draftit të asociacionit të komunave me shumicë serbe. Kjo pasi PDK-ja e vlerësoi si të panevojshëm një takim që sipas tyre nuk do të prodhonte efekt, kurse AAK-ja nuk u përputh me orar të presidencës.
E hëna ishte planifikuar të jetë e ngjeshur me takime të presidentes, Vjosa Osmani.
Nga të gjithë opozitarët, asaj në zyre i shkoi vetëm kreu i LDK-së, Lumir Abdixhiku.
Ftesë për takim kishin pasur edhe krerët e tjerë opozitarë, që të konsultoheshin në lidhje me draft statutin e asociacionit të komunave me shumicë serbe.
Me arsyen se një takim i tillë nuk do të prodhonte ndonjë efekt, PDK-ja, nuk iu përgjigj pozitivisht Osmanit.
Në presidencë shkoi, por nuk zhvilloi takim, kreu i AAK-së, Ramush Haradinaj.
Kjo pasi sipas kësaj partie, Osmani nuk e respektoi orarin për të cilin ishte lënë që të mbahej ky takim.
Kryetari Ramush Haradinaj si dhe Sekretari i Përgjithshëm Muharrem Nitaj ishin në Presidencë në orarin e përcaktuar nga Presidentja Osmani, por fatkeqësisht Presidentja nuk respektoi orarin e caktuar nga vetë ajo dhe për këtë arsye takimi nuk është realizuar.
Ndryshe u shpreh presidenca.
Sipas këtij institucioni, Haradinaj nuk priti derisa protokolli të bënte njoftimet e nevojshme për takim.
“Takimi ishte paraparë të mbahet, por për shkaqe protokollare nuk është realizuar. Z.Haradinaj nuk ka dashur të presë derisa protokolli e ka njoftuar Presidenten për arritjen e tij.
Pavarësisht kësaj, Presidentja Osmani ka lënë të hapur mundësinë e takimit ditëve në vazhdim, kurdo që kreu i AAK-së e vlerëson se duhet diskutuar dhe adresuar çështjet e rëndësisë nacionale.
Dera e Presidencës vazhdon të mbetet e hapur”, thuhet në një njoftim nga Presidenca.
Megjithatë, nuk është njoftuar ndonjë datë tjetër konkrete se kur do të mund të zhvillohet ky takim mes Osmanit e Haradinaj.
