Shënonte ora 22:00, kur në qendër të Ferizajt u dëgjuan disa krisma.
Të premten mbrëma, një 24-vjeçare u plagos me armë zjarri nga i dashuri i saj.
I dyshuari V.K, pas shtiu në drejtim të L.U., më pas plagosi edhe vetën.
I gjithë rasti kishte ndodhur pranë një barnatore në rrugën “Driton Ismaili”.
Për pasojë, të dy u dërguan për trajtim në Qendrën Klinike Universitare të Kosovës.
Por nga lëndimet e marra, 32-vjeçari vdiq.
“Personi V. K., i cili në këtë rast ishte në cilësinë e të dyshuarit dhe po trajtohej në QKUK në Prishtinë, si pasojë e lëndimeve të marra, më 11.04.2026, rreth orës 04:05, sipas informatës së pranuar nga QKUK në Prishtinë, ka ndërruar jetë”, u tha nga QKUK.
Televizioni ka tentuar të marrë një përgjigje edhe për gjendjen e 24-vjeçares, por nga QKUK nuk kanë dhënë ndonjë informatë, veçse e njëjta po trajtohet në Klinikën e Ortopedisë.
Dëshmitar të rastit kanë bërë të ditur për Tëvë1 se e njëjta mori lëndime në këmbë.
“Mbrëmë lajmin e parë e kom marr kur kom dal me i hek bërllokun e makinave nëpër kontejnerë. Atëherë tre vajza janë taku në mu edhe tu kajt. Një njeri me allti po don me vra një vajzë. Ka hi në barnatore”, tha dëshmitari.
Pasi vajzat hynë në punëtorinë e tij, dëshmitari thotë se kishte shkuar ta shihte situatën nga afër.
“Vajzën e shtrirë e kam pa pasi janë ardh policia. Dy policë i kanë dhënë ndihmë vajzës, ia kanë ndal si gjakderdhje në këmbë…Kështu që është kon e shtrime para barnatores si e mbledhur truq. Ma shumë nuk di”, tha dëshmitari.
Nga barnatorja nuk pranuan të japin detaje për televizionin.
Derisa motivet e rastit nuk dihen ende.
Rasti fillimisht është cilësuar si “Vrasje e mbetur në tentativë”, ndërsa sipas Policisë, pas rrethanave të reja, mbetet në kompetencë të prokurorit për cilësimin e mëtejshëm ligjor.
