Në Gjykatën Themelore në Ferizaj ka nisur seanca gjyqësore ndaj gjashtë të pandehurve, të akuzuar për vrasjen e rreshterit të Policisë së Kosovës, Muhamet Lika.
Prokuroria Themelore në Ferizaj, Departamenti për Krime të Rënda, më 9 janar 2026 ka ngritur aktakuzë ndaj gjashtë të pandehurve me inicialet H.B., R.M., V.Ç., E.L., SH.K. dhe D.G.
Gjatë seancës së sotme ka dëshmuar Nehat Lika, i cili ka folur për komunikimin e fundit me të ndjerin dhe për rrethanat në të cilat e kishte marrë vesh për plagosjen e tij.
Dëshmitari ka deklaruar se Muhamet Lika nuk i kishte treguar për ndonjë shqetësim tjetër, përveç dëshirës për të krijuar familje dhe për t’u zhvendosur në banesën e re.
“Brenga e tij ka qenë me pas fëmijë, krijimin e familjes e me dalë në banesë të re. Gjëra tjera s’kemi diskutuar. S’kam mundur të vërej ndonjë brengë tjetër a shqetësim. S’ka kallëzuar sen.”
Ai ka treguar edhe për takimin e fundit me Muhametin.
“Jena kon tu dalë natën e Bajramit me pi kafe, edhe m’tha edhe nja 10 ditë me dalë n’banesë t’re. Tani e ka thirrë bashkëshortja Violeta me hangër bukë, edhe tana u qum. Tani edhe dy ditë u kon n’punë, po s’jam taku me to hiç”, ka thënë Nehat Lika.
Më pas, dëshmitari është pyetur nga prokurori i rastit, Ismet Rrahmani, se si e kishte kuptuar lajmin për rastin.
Nehat Lika ka deklaruar se për ngjarjen ishte njoftuar përmes rrjeteve sociale dhe më pas ishte nisur drejt banesës së Muhametit.
“Unë e kam kuptu nga faqja ‘S’je Kaçanikli’, edhe jam nis me shku te banesa e Muhametit. Kish pas shumë kallabllak, policë e qytetarë. M’thanë e kanë nis për emergjencë. Fillimisht e kam ditë që është i plagosur. Jam nis direkt për emergjencë.”
Ai ka rrëfyer edhe takimin me bashkëshorten e Muhametit, Violeta, në emergjencë.
“Si kom hy në emergjencë e takova Violetën, e pyta çka u bo, më tha që është plagos Muhameti.”
Dëshmitari ka thënë se të akuzuarit nuk i kishte njohur personalisht, por se disa prej tyre i kishte parë më herët.
“Të akuzumit nuk i kam njoftë personalisht, po Kaçaniku është vend i vogël edhe i kam pa si fytyra”, ka deklaruar Nehat Lika.
Seanca ndaj gjashtë të pandehurve është duke vazhduar në Gjykatën Themelore në Ferizaj.
