I ftuar në emisionin “Ditari” në tëvë1, ai thotë se kolegët e tij partiakë kanë dalë me këso propozimesh në mënyrë që të ketë një zgjidhje më “të butë”.
Sipas tij, mendimet e tyre janë të njëjtat me ato të ministres së Arsimit, Arbërie Nagavci e cila propozoi që mësimdhënësve t’u jipet avans në pagë dhe orët e humbura të zëvendësohen.
“Nuk i kisha quajtur se kanë dalë kundër por kanë dhënë një mendim më të butë se si e shohin një zgjidhje kanë kërkuar të ketë zgjidhje, mirëpo MASHTI vetëm se doli me një vendim që është në frymën e asaj që kanë dalë deputetët, konsideroj se nuk janë kundër ministrit. Kanë thënë që orët duhet të kompensohen dhe të zëvendësohen dmth të mbahet mësimi të shtunave”, tha ai.
Madje, ai pretendoi se e gjithë greva kishte qëllime politike dhe ishte e shtyrë nga partitë opozitare.
“Unë pikërisht këtë qasje e shoh që nuk ka qenë edhe qëllimi i ngritjes së pagave, dmth qëllimi është politik fatkeqësisht një pjesë e madhe kanë rënë pre e këtyre agjendave politike dhe janë duke i shërbyer partive opozitare. Ndoshta dikush pa vetëdije dhe më vjen keq që e kanë zgjedh arsimin në këtë pikë kur bëhet agjendë politike e partive opozitare”, shtoi ai.
Tutje, Haliti thekson se nga kjo grevë në sektorin publik dhe atë arsimor nuk ka dalë askush fitues.
“Gjithë po pajtohemi që greva nuk është e mirë dhe nga kjo s’ka dalë fitues asnjëri duhet të pajtohemi të gjithë dhe kërkesat kanë qenë në kohë joreale për shkak të krizës në Kosovë, por edhe Evropë dhe botë”, shtoi ai.
Po ashtu, deputeti i partisë në pushtet nuk la pa përmendur edhe “keqqeverisjen 20-vjeçare”, teksa potencoi se Qeveria nuk mundet që për një vit e gjysmë të zgjidhë të gjitha problemet.
“Mirëpo, është e vërtetë që kërkesat datojnë për vite të tëra kur kanë qeverisur edhe partitë tjera realisht ato që tentojnë t’i ndërtojnë këto kauza duke goditur qeverinë aktuale duke ndërtuar një kauzë kinse duke i mbështetur sindikatat janë të njëjtit që kanë qeverisur dhe nuk kanë ofruar zgjidhje për pagat, cilësinë në arsim dhe përmirësim të kushteve… Nga kjo qeveri s’mund të pritet që për një vjet e gjysmë të zgjidh të gjitha problemet”, deklaroi ai./teve1.info/